Саха сирин баһылыга Егор Борисов дойду президенин Владимир Путины кытта көрсүһүүгэ Өлүөнэ өрүһү туоруур муостаны тутууну «2020-2030 сылларга Россияҕа тырааныспар систиэмэтин сайыннарыы» тус сыаллаах федеральнай бырагыраамаҕа киллэрэри туруоруста. Ити туһунан Ил Дархан официальнай саайтыгар суруллар.
Өрөспүүбүлүкэҕэ сылы эргиччи тырааныспар сырыыта хааччылларын туһугар Томмот – Аллараа Бэстээх хайысханан тимир суолу тутуу түмүктэниэхтээҕин, Өлүөнэ өрүһү туоруур муоста тутуллуохтааҕын туһунан Егор Борисов эттэ.
Муостаны тутуу Россия тырааныспарын стратегиятыгар тутаах бырайыак быһыытынан киирэ сылдьар. Бу олоххо киириитэ өрөспүүбүлүкэ киин, илиҥҥи уонна арҕааҥҥы оройуоннарын сырыытын хааччыйарын таһынан таһаҕас кэмигэр тиэрдиллэригэр олугу уурар. Ону таһынан таһаҕаһы тиэйии ороскуота 30% кыччыыр.
2013 сыл муус устарыгар РФ бырабыыталыстыбатын 489-р №-дээх «Дьокуускай куорат таһынан массыына суоллаах Өлүөнэ өрүһү туоруур муостаны тутууга концессионнай сөбүлэһиини түһэрсии туһунан» дьаһалынан аһаҕас куонкурус биллэриллибитэ. Ол эрээри бюджет үбэ-харчыта ситэритэ суоҕуттан дуогабар күн бүгүҥҥэ диэри түһэрсиллэ илик. Эбийиэк 2020 сыл кэнниттэн тутуллар диэн буолбута.
2015 сылга Саха сирин былааһын уоргана омук инвестордарын бу үлэҕэ тардар туһунан РФ бырабыыталыстыбатыттан көрдөспүтэ. Россия уонна Кытай инвестицияҕа хардарыта үлэлиир бырабыыталыстыбалар икки ардыларынааҕы хамыыһыйа үһүс мунньаҕар (Пекин куорат 2016 сыл бэс ыйын 24 күнэ) ылыллыбыт быһаарыынан Өлүөнэ өрүһү туоруур муостаны тутуу Россия уонна Кытай хардарыта ыытар инвестиционнай бырайыактара буолбута.
Егор Борисов Владимир Путин Россия тырааныспарга, экономическай сайдыы, үп министиэристибэлэригэр федеральнай бюджеттан «Россияҕа тырааныспар систиэмэтин сайыннарыы (2020-2030 сылларга)» тус сыаллаах федеральнай бырагыраама чэрчитинэн үбүлээһини оҥорор туһунан сорудахтыырыгар көрдөстө.
Дойду президенэ муостаны концессия усулуобуйатыгар тутары, онуоха Кытай партнердарын үлэлэтэргэ сөбүлэһэр. Кини РФ бырабыыталыстыбатын бастакы вице-премьерыгар Игорь Шуваловка торумнаммыт үлэни уонна бу тула бүгүҥҥү балаһыанньаны билиһиннэрэригэр сорудахтаата.
