«Сириус» оҕо үөрэҕин киинигэр Владимир Путины кытта көрсүһүүгэ Аллараа Бэстээхтэн 10 кылаас үөрэнээччитэ Ашот Шагенян Россия эдэр учуонайдарын үбүнэн өйүүр туһунан ыйытыыны биэрбитэ. Өрөспүүбүлүкэ үөрэҕин уонна наукатын миниистирэ Владимир Егоров этэринэн, Саха сиригэр талааннаах оҕолору кытта үлэ өссө ааспыт үйэ 60-с сылларыттан саҕаламмыта.
Санатар эбит буоллахха, «Недетский разговор с Владимиром Путиным» бырагыраама эфиригэр Ашот Шагенян президеҥҥэ бырабыыталыстыбанан үбүлэнэр эдэр учуонайдар талыллыбыт хамаандаларын тэрийэр туһунан этии киллэрбитэ. Маны сэргэ, эдэр киһи 2018 сылга АХШ Intel быыстапкаҕа ыҥырыктааҕын эппитэ. Ити эрээри айан төлөбүрэ уонна кыттыы иһин холбоон 300 тыһ.солкуобай ирдэнэрин иһитиннэрбитэ.
Субуота күн Ашот Шагеняны кытта регион баһылыга Егор Борисов телефонунан кэпсэппиттэр. «Бүгүн мин Ашотка телефоннаатым уонна биһиги кини курдук өйдөөх, быһаарыылаах ыччаты куруук өйүүрбүтүн эттим. Өйөбүл инникитин өссө күүһүрүөҕүн иһитиннэрдим«, — диэн Ил Дархан бэйэтин Instagram-гар бэлиэтээбит.
Өрөспүүбүлүкэ үөрэҕириигэ уонна наукаҕа миниистирэ Владимир Егоров СИА-ҕа Саха сиригэр талааннаах оҕолору өйөөһүн өссө ааспыт үйэ 60-с сылларыттан саҕаламмытын тоһоҕолоон бэлиэтээтэ.
«Өрөспүүбүлүкэҕэ физика-математика хамсааһына 50 сыл анараа өттүгэр саҕаламмыта. Төрүттээччитинэн САССР норуодунай учуутала Михаил Алексеев буолар, быйыл кини 100 сааһын бэлиэтиибит. 1966 сыллаахтан анал физика-математика хайысхалаах кылаастар үлэлээн барбыттара. Салгыы өрөспүүбүлүкэтээҕи оскуолаҕа, колледжка тиийэ улааппыта. Билигин — өрөспүүбүлүкэтээҕи лицей-интернат быһыытынан киэҥ далааһыннаах үлэни ыытар«, — диэн биэдэмистибэ салайааччыта кэпсиир.
Кини талааннаах оҕолору өйүүргэ ааспыт үйэ 90-с сыллара история биир кэрдиис кэминэн буолбуттарын чуолкайдаан эттэ. Саҥа үөрэх тэрилтэлэрэ баар буолбуттара: өрөспүүбүлүкэтээҕи хореография училищета, Музыка үрдүкү оскуолата, «Ленскэй кыраай» физика-математика форума, олимпийскай саппаас училищета.
«Билигин талааннаах оҕолору өйүүр анал ситим баар. Онно олоҕуран оҕолор регионнар икки ардыларынааҕы, норуоттар икки ардыларынааҕы научнай конференцияларга, олимпиадаларга толору кыттар кыахтаахтар. 2015 сыллаахха тэриллибит Саха сирин наукатын кыра академията наука-чинчийии хайысхатыгар туох баар усулуобуйаны киэҥник тэрийэр. «Инникигэ хардыы» хамсааһыны «Барҕарыы» национальнай фонда өйүүр«, — диэтэ Егоров.
Кини этэринэн, билигин Саха сирин Баһылыгын талааннаах оҕолору өйүүр ыйааҕа бэлэмнэнэр. Манна биир сүрүн пуунунан талааннаах оҕолору кытта араас хайысханан үлэлиир Ил Дархан иһинэн үөрэх тэрилтэлэрин ситимэ тэриллиэ.
