Муус устар 21-30 күннэригэр Италия Кальяри куоратыгар саахымакка аан дойду чөмпүйэнээтэ буолан ааста. Күрэхтэһиигэ аан дойду 56 куоратыттан 252 киһи араас рейтиҥҥэ арахсан оонньоото. Манна Саха сириттэн М.К. Аммосов аатынан ХИФУ ФЭИ 4 кууруһун устудьуона Вилена Попова уонна Дьокуускай куораттан “Аргыс тур” тэрилтэ үлэһитэ Туяра Адамова ситиһиилээхтик кыттан кэллилэр.
Вилена 1700 диэри рейтиннээх сүүрбэ оонньооччуну кытта күөн көрсөн, тоҕус туур түмүгүнэн 7,5 очукуону ылан бастаата. Оттон Туяра 2300 диэри рейтиннээхтэр ортолоругар иккис миэстэ буолла.
Күрэхтэһии туһунан Вилена бу курдук кэпсиир:
“Күрэхтэһиигэ былырыыҥҥытааҕар өссө элбэх кыттааччы кэлбит. Бары да күүстээх, кыайыыга дьулуурдаах оонньооччулар. Саахымат оонньуутун сэргиир, тиһигин быспакка дьарыктанар киһи сыл аайы элбээн, күрэхтэһии таһыма үрдээн иһэр эбит. Аан дойду чөмпүйэнээтигэр кыттарбар күүс-көмө буолбут дьоммор махтанабын, чуолаан М.К. Аммосов аатынан ХИФУ ректорыгар Евгения Исаевна Михайловаҕа уонна университет “Эндоумент фонд” тэрилтэтигэр”.
Вилена оҕо эрдэҕиттэн саахыматынан дьарыктанар, өрөспүүбүлүкэ биир инники күөҥҥэ сылдьар оонньооччута. Саахымат аан дойду таһымнаах түһүлгэтигэр кыттан иккис төгүлүн чөмпүйүөн аатын ылла. Онон биһиги оҕобут ситиһиитинэн киэн туттабыт, бу курдук бииртэн биир үрдэли эрэллээхтик дабайан иһиэҕэ диэн эрэнэбит.
edersaas.ru сайтка анаан Аэлита Попова.
