Саха сирин олохтооҕо Виктор Рассадин көҥүл тустууга Россия чемпионатыгар иккис төгүлүн үрүҥ көмүс призерунан буолла. Түмүктүүр киирсиигэ Рассадин Европа чемпиона Гаджимурад Рашидов утары кииристэ.
Күрэхтэһии Ингушетияҕа бэс ыйын 12-14 күннэригэр буола турар. Виктор Рассадин 61 кг тиийэ ыйааһыҥҥа тустар. Биэстэ киирсибититтэн, түөрдүн кыайда. Бастакы хапсыһыыга 2015 сыллааҕы дойду чемпионатын боруонса призерун Рустам Абдурашидову — 12:2 очконан сабарыйда, онтон Чермен Тавитовы (Севернай Осетия) — 11:1, финал чиэппэригэр чеченец Ислам Дудаевы 14:4 ахсаанынан кыайталаата. Финалга тахсар күөн көрсүһүүгэ Крымтан сылдьар Шамиль Омаров утары киирсэн, эмиэ өрөгөйдөөтө.
Түмүктүүр киирсиигэ Рассадиҥҥа Европа чемпиона Гаджимурад Рашидов тахсар. Бастакы баал Виктор киирсэн испэт диэн ааттаан, дагестанецка биэриллэр. Иккиэн да олус сэрэхтээхтик туһуннулар, бэйэ-бэйэлэрин кэтэһэ сылдьаллар. Тустуу иккис аҥарыгар ахсаан тэҥнэһэр. Бүтэһик 30 сөкүүндэ хаалбытыгар Рассадин түргэн туттунуутунан, Рашидов көхсүгэр баар буолар уонна утарылаһааччытыттан икки баалга тэйэр (3:1). Ити эрээри дагестанец саха бөҕөһүн атаҕар иилиллэр, итиэннэ көхсүгэр тиийэр уонна кыайыыга сирдиир икки очкуону сурунар. Ахсаан төһө да тэҥнэстэр, бүтэһик хамсаныыны Рашидов оҥорбут буолан, кыайыы киниэхэ бэриллэр.
Виктор Рассадин — чемпионат бастакы күнүгэр сахалартан бастакы мэтээли ылбыт бөҕөс. Бу мэтээл тустуук чыпчаалыгар иккис үрүҥ көмүс наҕараадата. Санатар эбит буоллахха, сыл анараа өттүгэр Дьокуускайга буолбут күрэххэ Рассадин биир дойдулааҕар Егор Пономаревка бэрт кыранан хотторон иккис миэстэни суруммута.
