Спорт арбитражнай суута норуоттар икки ардыларынааҕы олимпийскэй кэмитиэт допины тутта сылдьыбыт спортсменнары Олимпиадаҕа киллэрбэт туһунан быһаарыытын көтүрдэ. Онон, Виктор Лебедев оонньууларга кыттыан сөп балаһыанньата үөскээтэ.
Санатар буоллахха, норуоттар икки ардыларынааҕы кэмитиэт допины тутта сылдьыбыттары быйылгы Олимпиадаттан туоратар туһунан быһаарыыны ылыммыта. Кинилэр ортолоругар Виктор Лебедев баара. Кини 2006 сыллаахха эдэрдэр ортолоругар аан дойдуга бастыыр иһин күрэхтэһиигэ болденон диэн препараты туттубута биллэр. Манна кини кыһыл көмүс мэтээли ылбыта.
«Норуоттар икки ардыларынааҕы олимпийскэй кэмитиэт быһаарыытын үһүс пууна сокуоннай күүһэ суох, тоҕо диэтэххэ атлеттар сиэрдээх быһыыга бырааптарын кэһэр», — диэн спорт арбитражнай суутун иһитиннэриитигэр этиллэр.
Суут генеральнай сэкэритээрэ Матье Риб быһаарыыны көтүрүү бастакы хардыы буоларын ыйар.
«24 чаас иһигэр апелецияны ылыныахпытын сөп», — диир кини.
Россия харбааһыҥҥа бэрэстэбиитэлэ Юлия Ефимова эмиэ Виктор Лебедев курдук балаһыанньалааҕа. Кини Олимпиадаҕа кыттар быраабы ылла. Онон, спортсмены Россия сүүмэрдэммит хамаандатын састаабыгар киллэрии саҕаланна. Ити туһунан Ефимованы көмскээбит адвокат Артем Пацев этэр. Виктор Лебедев интэриэһин эмиэ бу адвокат көмүскүүр.
Саха сирин баһылыга Егор Борисов Instagram балаһатыгар эрдэ суруйбутунан Виктор Лебедев Олимпиадаҕа кыттарын дуу, кыттыбытаны дуу оҕунан ытыы норуоттар икки ардыларынааҕы федерациятын президенэ Угур Эрденер, атлетическэй хамыыһыйа бэрэстэбиитэлэ Клаудиа Бокель уонна норуоттар икки ардыларынааҕы олимпийскэй кэмитиэт урукку президенин уола Хуан-Антонио Самаранч быһаарыахтара.
«Мин Бииктэри кытта куруук кэпсэтэбин. Төһө да маннык улахан мэһэйдэр баалларын иһин, кини санаата күүстээх. Бүтэһиктээх быһаарыы сарсын биллэр. Барыта — хамыыһыйа уонна айбыт Айыы Таҥара илиилэригэр!» —диир Егор Борисов.
