АЛРОСА-Ньурба акцияларын билигин атыылыыр тоҕоостоох. Мантан киирбит үп-харчы судаарыстыба иэһин толуйууга туттуллуохтаах. Ити туһунан суруналыыстарга норуот дьокутаата Виктор Федоров этэр.
2015 сыл түмүгүнэн өрөспүүбүлүкэ АЛРОСА-Ньурба акцияларыттан дивидент быһыытынан 1,4 млрд солк. ылбыт. «Компания быйыл хаһааҥҥытааҕар да барыстаахтык үлэлээтэ, ону таһынан ырыынакка куһаҕана суох быһыы-майгы үөскээн турарын бэлиэтиир наадалаах. Бу кэми туһанан акциялары атыылыыр ордук», — диир кини.
Федоров этэринэн, АЛРОСА-Ньурба акциялара биржа фондатын испииһэгиттэн таһаарыллыахтарын сөп. Ол эбэтэр биржаҕа атыыланар кыахтара суох буолан хаалар. Оччотугар акциялар алын кээмэйинэн сыаналаныахтарын, өрөспүүбүлүкэ пакета 2 мөл.солк. туруон сөп.
«АЛРОСА-Ньурба акциялара ырыынакка сыаналаммыттарын иһин, атыылааччы да, атыылаһааччы да суох. Биһиги акциялары хайдах уонна төһө сыанаҕа атыылыыры билэбит. Тутулуга суох сыаналааһын оҥоһуллуон сөп, оччотугар процесс судургута суох буолар», — диир Федоров.
Акциялары солуок быһыытынан биэриигэ кини туспа көрүүлээх: «Федеральнай экспердэр этэллэринэн, акциялар ырыынак сыанатыгар чугаһыыр суумаҕа атыыланар толору кыахтаахтар. Итини кинилэр бигэргэтэллэр. Акцияны солуок быһыытынан туттар буоллахха, 15 млрд солк. оннугар баан 10-ун эрэ биэриэҕэ. Иэс бэйэтин да сыанатыгар уонна бырыһыаныгар элбэҕи сүүйтэрэбит. Акциялары солуоктан төттөрү ыларга анаан 2017-2019 сыллааҕы бюджекка кэпиэйкэ да харчы көрүллүбэтэх. Ырыынакка баар халбаҥнааһыннары эмиэ учуоттуур ордук. Солуок биэрэн элбэҕи сүтэрэбит диэн хатылаан этэр оруннаах. Онон атыылыыр ордук», — диир кини.
Федоров этэринэн, АЛРОСА-Ньурба биир үксүн хонтуора быһыытынан үлэлиир. «АЛРОСА-Ньурба — 65 үлэһиттээх хонтуора Москваҕа, Мииринэйгэ, Ньурбаҕа үс филиалга хайдар. АЛРОСА хайа-байытар кэмбинээтэ эрэ оҥорон таһаарар», — диир кини.
«Үп-харчы хааһынаҕа баарынан, акция атыытыттан киирбит харчы бюджекка ыытыллыахтаах. Ити бастатан туран судаарыстыба иэһин кыччатыыга ыытыллыахтаах. Оччотугар иэс кээмэйэ 46-тан 30 млрд солк. диэри намтыыр», — диир дьокутаат.
