Социальнай ситимнэргэ уонна мессенджердарга Саха сирин Арктикатын улуустарыгар ветеринария управлениелара уларыта тутуллалларын туһунан күүскэ ырыталлар. Санаа араас: исписэлиис штата сарбыллыытыттан тэрилтэ төрдүттэн суох буолуутугар тиийэ. Тустаах департамеҥҥа бу сураҕы баар балаһыанньаны кытта сөп түбэспэт диэтилэр.
«СӨ ветеринариятын департамена иһитиннэрэр — тарҕаммыт сонун баар балаһыанньаны кытта сөп түбэспэт», — биэдэмистибэ официальнай суругар этиллэр.
Департамеҥҥа быһаарбыттарынан, былырыын тэрилтэлэр тэрийэр-штат тутулларыгар бэрээдэктээһин уонна бюджет ороскуоттуур чааһын сааһылааһын саҕаламмыт. Бирикээһи толоруу кэмигэр биир да штатка баар үлэһит ахсаана аҕыйатыллыбатах, 2021 — 2023 сыллааҕы сулууспа үлэһиттэрин хамнастарын пуондата толору көрүллүбүт.
Бэрээдэктээһин Аллайыаха, Эдьигээн, Уус-Майа улуустарыттан саҕаламмыт. Бу тэрээһиннэр миэстигэр үлэлиир учаастактары тохтотор сыаллаах ыытыллыбаттар. Исписэлиистэр үлэлииллэр, бас бэринии тутула эрэ уларыйда.
Салгыы Абый, Анаабыр, Муома, Өймөкөөн, Өлөөн оройуоттарын управлениеларын холбооһун ыытыллар. Уларыта тутуу кэмигэр сулууспа үлэтин көдьүүһүн намтатыыны таһаарыллыбатыгар уонна миэстэтигэр эпизоотическай туруктаах буолууну инники күөҥҥэ тутуллар.
Биэдэмистибэҕэ чуолкайдаан биэрбиттэринэн, бирикээс Ил Дархан 2018 сыллааҕы уонна бырабыыталыстыба 2019 сыллааҕы бюджекка сыһыаннаах дьаһалларыгар олоҕуран ылылынна.
