29 Кулун тутар 29.03
  • -11°
  • $ 92,26
  • 99,71

Верхоянскайга 24 кыбартыыралаах таас дьиэ тутуута саҕаланна

17:01, 08 сентября 2020
Текст:
Читайте нас на
Яндекс Новости
ЯДВ

Балаҕан ыйын 6 күнүгэр Дьааҥы улууһун Верхоянскай куоратыгар 4 этээстээх 24 кыбартыыралаах таас дьиэ сыбаайатын түhэрии үөрүүлээх тэрээһинэ буолла. Манна 2025 сылга диэри «Хаарбах дьиэттэн көhөрүү» федеральнай бырагыраама чэрчитинэн барыта 29 дьиэ тутуллара былааннанар. 


Оройуон баһылыга Гаврил Ильич Чириков бу үөрүүлээх уонна долгутуулаах түгэнинэн куорат олохтоохторун эҕэрдэлээн туран, СӨ Ил Дархана Айсен Николаев Уһук Хоту дойду сайдыытыгар болҕомтотун ууран, Арктика улуустарыгар улахан хамсааһыннар буола туралларын сырдатта.

Оройуоннааҕы олох-дьаhах, архитектура уонна тутуу отделын эдэр салайааччыта Михаил Прокопьевич Другин 2025 сылга диэри үлэлиир республиканскай программа чэрчитинэн тутуулар баралларын этиитэ ытыс тыаhынан доҕуhуолланна.

Куорат баhылыга Евгений Александрович Потапов «Хаарбах дьиэттэн көhөрүү» федеральнай программанан 2021-2025 сылларга уопсайа 29 дьиэ тутуллуохтааҕын этэн туран, олохтоох дьаhалта уонна куорат сэбиэтин депутаттарын ааттарыттан бар дьонун, куорат олохтоохторун эҕэрдэлээтэ.

«Биир ньыгыл Арассыыйа» партия Дьааҥытааҕы отделын толорор (исполнительный) сэкэрэтээрэ Надежда Васильевна Саввинова, ыччат аатыттан Ирина Васильевна Сыромятникова эҕэрдэлээтилэр.

Бастакы элбэх ыал олороругар туhуламмыт таас дьиэ сыбаайатын аал уот оттон, алаадьылаан, саламааттаан, сиэлинэн сыт таhааран, сахалыы сиэринэн ыыттылар. Дьааҥы ырыатын-тойугун толорооччу, алгысчыт Мария Иннокентьевна Сыромятникова этэр тылын хомуhуна, доллоhутар тойуга, сахалыы тыын бу кырдьаҕас куоракка былыргыттан иҥэн сытарын кэрэhэлииргэ дылы, ыраахха диэри дуорайа иhилиннилэр.

Тымныы чыпчаалын дойдутугар бастакы 4 этээстээх 24 кыбартыыралаах таас дьиэни Карен Андрушович Мартиросян тэрилтэтэ тутуо.

Следите за самым важным и интересным в Telegram-канале и WhatsApp-группе ЯСИА