Вера Кузакова: Саха сиригэр саҥа тутуллар дьиэ хаачыстыбатыгар улахан сэмэлээһиннэр бааллар

Саха сиригэр олорор дьиэни тутуу тэтимнээхтик барар. Сыл саҕаланыаҕыттан ыла 242 тыһ. кв. м иэннээх олорор дьиэ үлэҕэ киирдэ. Ити былаан 33% ылар. Ол эрээри, сорох оройуоннарга тутуу хаачыстыбата быстар мөлтөҕүн туһунан эттилэр.


«Былааны толорон иһии көрдөрүүтэ үчүгэй. Ол гынан баран ситиһиллибитинэн муҥурданыа суохтаахпыт. 600 тыһ. кв. м диэн балачча улахан үлэ», — диэн коллегия мунньаҕар архитектура уонна тутуу комплексын миниистирэ Вера Кузакова эттэ.

Биэдэмистибэ дааннайдарыгар көстөрүнэн, алта ый устатыгар 242,3 тыһ. кв. м иэннээх дьиэ үлэҕэ киирбит. Үрдүк хаачыстыбалаах олорор дьиэнэн 2019 сылга диэри хааччыйыы бырагырааматыгар уопсайа 9,9 млрд. солк. көрүллүбүт.

45 эдэр ыал, Аҕа дойду улуу сэриитин 2 бэтэрээнэ, бойобуой дьайыылар 3 инбэлиитэ уонна бэтэрээнэ судаарыстыба көмөтүнэн туһанан олорор дьиэлэрин тупсарбыттар.

Саахаланар кутталлаах эргэ дьиэлэртэн 1384 киһи көһөрүллүбүт.

Вера Кузакова тутуллар дьиэ хаачыстыбатыгар мустубут дьон болҕомтотун тарта. «Эргэ дьиэлэртэн дьону көһөрүүгэ өрөспүүбүлүкэтээҕи тус аадырыстаммыт быраграама чэрчитинэн тутуллар дьиэлэр хаачыстыбаларыгар улахан сэмэлээһин баар», — диир миниистир.

Үөскээбит ити кыһалҕаны туоратыыга дьон үҥсүүтүнэн үлэлиир регионнааҕы хамыыһыйаны таһынан Саха сирин тутааччыларын сойууһун, уопсастыбаннай сэбиэттэри түмэр наадалааҕын миниистир ыйда.

Соторутааҕыта саҥа тутуллубут олорор дьиэ мөлтөх туруктааҕын туһунан элбэх үҥсүү Уус-Маайа, Хаҥалас, Мэҥэ-Хаҥалас, Муома улуустарын, Өлүөхүмэ, Ленскэй куораттарын, Уус-Ньара бөһүөлэгин, Сунтаар нэһилиэгин олохтоохторуттан киирбит.

This post was published on 22.07.2016 15:33 15:33