«Сахамедиа» холдинг иһинэн тахсар «Якутия» уонна «Саха Сирэ» босхо хаһыаттар бэчээттэнэн тарҕатылыннылар. Онон хаһыаты кэмигэр тиэрдиигэ күүстээх үлэ саҕаланна. Ол эрээри, сибиэһэй сонуннардаах хаһыаттары улуустарга тута тиэрдиигэ, уустуктар бааллар. Үлэ-хамнас туһунан холдинг коммерческай сулууспатын салайааччы Вера Арбыкина иһитиннэрдэ.
Кини кэпсээбитинэн, бу хаһыаттар босхо тахсар буолалларын туһунан иһитиннэрии тахсарын кытары, «Сахамедиа» холдиҥҥа күн аайы тыһыынчанан киһи төлөпүөнүнэн эрийбит. Ол түмүгэр билигин «Якутия» уонна «Саха Сирэ» 45, 37 тыһыынча экземплярынан тахсар буолбуттар. Хаһыаттарга дизайныттан саҕалаан элбэх уларытыы киллэриллэн, саҥалыы тыыннаммыттара харахха тута быраҕыллар.
«Биллэн турар, маннык уларытыыга дьон санаата араас. Биирдиилээн да буоллар, сурутуу быстан хаалла диэн хомуруйааччылар бааллар», — диир Вера Арбыкина.
Салгыы хаһыаты тарҕатыы штатнай режиминэн баран иһэрин, маннык дьаһанан үлэлээһин холдинг үлэтигэр улахан үөрүйэхтэнии буоларын, онон ааҕааччылар ону учуоттууллара наадатын туһунан эттэ.
«Билигин хаһыаты тарҕатыыбыт бастакы нэдиэлэтэ. Маныаха маннык элбэх тираһы тиэрдэ охсорготуох баар болҕомтобутун ууран үлэлэһэ сылдьабыт. Бары почтамнар эбээһинэстэрин үллэстибиттэрэ. Онон суруппут дьон нэдиэлэ түмүктэниэр диэри хаһыаттарын бары тутуохтаахтар. Өскөтүн ким эмэ хаһыатын ылбакка хааллаҕына, биһиэхэ 424604 ньүөмэргэ эрийэн чуолкайдаһыан сөп», — диир холдинг коммерческай сулууспатын салайааччы.
Дьокуускайга «Саха Сирэ» сэрэдэҕэ, «Якутия» чэппиэргэ, бээтинсэҕэ атыыланар сирдэригэр, онтон Нерюнгрига, Алдаҥҥа, Мирнэйгэ, Ленскэйгэ субуотаҕа тиэрдиллибиттэр.
This post was published on 16.01.2017 11:04 11:04