Саха Өрөспүүбүлүкэтин Ил Дарханын 2017 сыл атырдьах ыйын 2 күнүнээҕи Ыйааҕынан Спорт үрдүкү маастарыстыбатын оскуолатын инструктор-спортсмена, көҥүл тустууга РФ спордун маастара, Самсун куоракка (Турция) ыытыллыбыт ХХIII сайыҥҥы Сурдлимпийскай оонньуулар чөмпүйүөннэрэ Стрекаловскай Василий Янович Саха Өрөспүүбүлүкэтин “Хотугу сулус” уордьанынан наҕараадаланна.
Ыйаахха этиллэринэн, Василий Стрекаловскай спорт сайдыытыгар уһулуччулаах өҥөтүн, олимпийскай хамсааһын идиэйэлэрин пропагандалааһынын, үүнэр көлүөнэни духуобунай, эт-хаан өттүнэн иитиигэ тус кылаатын уонна ХХIII сайыҥҥы Сурдлимпийскай оонньууларга үрдүк көрдөрүүтүн иһин бу үрдүк наҕараадаҕа тигистэ.
Стрекаловский Василий Янович 1989 сыл атырдьах ыйын 2 күнүгэр Чурапчы улууһун Дириҥ сэлиэнньэтигэр күн сирин көрбүтэ.
2007 сыллаахха инбэлииттэри реабилитациялыыр интернат-техникум кэнниттэн М.К. Аммосов аатынан Хотугулуу-Илиҥҥи университет физическай култуураҕа уонна спорка институтугар үөрэнэ киирбитэ уонна 2014 сыллаахха бүтэрбитэ.
2010 сыллаахтан Василий Стрекаловскай Арассыыйа үтүөлээх тириэньэрэ, дьүлэйдэргэ көҥүл тустууга Саха Өрөспүүбүлүкэтин старшай тириэньэрэ Стручков Василий Егорович салалтатынан эрчиллэр.
2007 уонна 2008 сылларга Василий Стрекаловскай Арассыыйаҕа бастыыр иһин күрэхтэһиилэргэ бастаабыта, дьүлэйдэргэ көҥүл тустууга Арассыыйа чөмпүйэнээтигэр хаста да миэстэлэспитэ. 2012 сыллаахха аан дойду чөмпүйэнээтигэр кыттан бэһис буолбута. Арассыыйа 2017 сыллааҕы чөмпүйүөнэ. Дойду истибэттэргэ көҥүл тустууга сүүмэрдэммит хамаандатын чилиэнэ.
