Арассыыйа чөмпүйэнээтигэр Василий Егоров кэлиҥҥи икки киирсиитэ тохтотуллуон, кыайыы утарсааччытыгар бэриллиэн сөптөөҕө, ол эрээри кини кыайыы көтөллөннө.
«Быйылгы сыл миэхэ чэпчэкитэ суох буолла. Саамай сүрүн күрэхтэһии – Олимпийскай Оонньууларга мин кыайтарбытым. Ити кэнниттэн ый буолан баран Арассыыйа чөмпүйэнээтигэр бэлэмнэнэн киирэн барбытым. Киирсии чэпчэки буолбатах этэ. Мин ыйааһыммар баар боксердар күүстээхтэр, ол эрээри мин киирсиини барытын 3:0 ахсаанынан хоттум», —диир Василий Егоров.
Сэтинньи 29 күнүгэр Оренбург куоракка Арассыыйа чөмпүйэнээтэ буолан ааспыта. Мэҥэ Хаҥаластан төрүттээх боксер Василий Егоров (49 кг ыйааһыҥҥа диэри) спортивнай суолугар иккис төгүлүн кыһыл көмүс мэтээли ылан, дойду сүүмэрдэммит хамаандатыгар бигэтик киирдэ.
Саха сирин боксера Михаил Прокопьевы (Красноярскай кыраай), Андрей Потемкины (Ульяновскай уобалас), Батор Сагалуевы (Бурятия), Бэлик Галановы (Бурятия) кыайталаата.
«Полуфинал уустук этэ. Бастакы рауҥҥа Сагалуевы кытта харсыһаммыт, хааһым хайа барбыта. Иккитэ бырааска ыыта сылдьыбыттара. Кинилэр хааспар икки сииги туруорбуттара. Боксер эчэйии кэнниттэн хаана аһара бардаҕына, киирсии тохтотуллар уонна кыайыы утарсааччыга бэриллэр», — диир чөмпүйүөн.
«Бэлик Голановка икки сыллааҕыта кыайтаран турардаахпын. Эчэйиилээх кинини кытта киирсэр олус уустук этэ. Киирсиигэ хараҕым аннынан гемотома турбута, ол улаатан иһэрэ. Онон күрэхтэһии түмүгэр утарсааччыбын аҥар харахпынан эрэ көрөр буолбутум. Ол да буоллар кыайдым. Арассыыйа чөмпүйүөнүн үрдүк аатын сүктүм. Өрөспүүбүлүкэҕэ бокса сайдыытын 60 сылыгар үтүө бэлэх буолла», — диэтэ кини.
Василий Егоров тохтуу түһэн баран Сочига барыаҕа. Дойду сүүмэрдэммит хамаандата онно Европа чөмпүйэнээтигэр бэлэмнэнэр.
