Горнай “Үлэ күүһэ” хаһыатын суруналыыстара Саха бэчээтэ бэлиэтэнэр туспа күннээх буолбутун үөрэ-көтө көрүстүлэр. Ил Дархан Айсен Николаевка, ону уһуннук туруорсубут Галина Бочкарева салайааччылаах Суруналыыстар сойуустарыгар истиҥник махтаналлар.


Ыйаах билиҥҥи уустук кэмҥэ, кумааҕынан тарҕанар бэчээт суолтата намтыы турар сылларыгар тахсыбыта, биһиэхэ иккис тыын биэрэр. Туох да диэбит иһин, саха тылын билиҥҥи туруга, кэскилэ, үүнүүтэ-сайдыыта нэһилиэнньэҕэ бүтүннүүтүгэр тарҕанар, хас биирдии ыал аайы кэрэ кэпсээннээх ымыылаах ыалдьыт буолан киирэр хаһыаттарга итэҕэйиллэр.  Онон маннык бэлиэ күн баар буолбута, «хаһыатчыттарга» аҥардас үөрүү-көтүү эрэ буолбакка, олус улахан эппиэтинэс сүктэриллибитин өйдүүбүт.

Хаһыат, сахалыы бэчээт үүнэ-сайда турдаҕына, тылбыт биир тэҥҥэ хаамсан, иннин диэки баран иһиэ. Бары билэбит, тылбыт баарын тухары саха норуота баар. Тыл симэлийдэ да, биһиги омук быһыытынан сүтэр дьылҕаланыахпытын сөп. Онон ханнык да балаһыанньаҕа саха бэчээтэ көйгөтүллүө суохтаах.

Маннык үөрүүлээх түгэҥҥэ Саха бэчээтин сайдыытын торумнуур, хас биирдии бу хайысхаҕа үлэлии сылдьааччыга, манна сыһыаннаах идэни баһылыан баҕалаах ыччакка эрэли саҕар, уонунан сылларга инникини торумнуур анал дьоһуннаах бырагыраама баар буолуон баҕарабын.

«Арааһа хаһыаттар  уонча, сүүрбэччэ сылынан ааҕааччылара суох буолуо, эстиэхтэрэ» диэн сэрэйэн көрөн санньыардык саҥарааччыларга, эҕэлээхтик этээччилэргэ, Саха сирин Ил Дарханын бу ыйааҕа сөптөөх хоруйу биэрэр дии саныыбын: «Хаһыаты таһаарыы, кинигэ бэчээттээһин ураты суолталаах, кэскиллээх, норуот сайдыытын быһаарсар үлэтэ өссө күүһүрэн иһиэхтээх».

Василий Алексеев, «Үлэ күүһэ» хаһыат эрэдээктэрэ, суруналыыстыка эйгэтигэр СӨ Судаарыстыбаннай бириэмийэтин лауреата, Горнай улууһун Бочуоттаах олохтооҕо. Источник: https://ulus.media/2020/02/14/vasilij-alekseev-becheet-noruot-sajdyytyn-by-aarsar-lete-ss-k-ren-i-ie/

0
0
comments powered by HyperComments