Саха оҕото имигэһин, кыахтааҕын, ураты тулуурдааҕын, сэмэй бэйэтэ күүс-уох өттүнэн таһымнааҕын сэтинньи 15-16 күннэригэр Хаҥалас улууһун Улахан Аан нэһилиэгэр «Дьулурҕан» II-с аһаҕас спортивнай саха төрүт оонньууларын бэстибээлигэр көрдүбүт. Павлов Валентин Васильевич аатынан иккис күрэхтэһии буолан ааста.


2-с Малдьаҕардааҕы агрооскуола оҕону төрүт өбүгэ үлэтигэр уһуйар, спорт араас көрүҥнэригэр дьарыктыыр, оҕону сахалыы иитиигэ сүрүн болҕомтотун уурар. Үөрэнээччилэр саха төрүт үлэтигэр үөрэх таһынан уһуйуллалларын таһынан, физкултуура уруоктарыгар, сынньалаҥ кэмигэр хаамыскалаан, наартыны ойон, тутум эргииргэ илин-кэлин түсүһэн, сынньалаҥ кэмнэрин бэрт туһалаахтык атаараллар.

Бу оскуолаҕа өр кэмҥэ физкултуура, начаалынай байыаннай бэлэмнэнии уонна история учууталынан үлэлээбит СР үөрэҕириитин туйгуна, СР үөрэхтээһинин бочуоттаах бэтэрээнэ Павлов Валентин Васильевич аатын үйэтитэр күрэхтэһиигэ Дьокуускай куораттан устудьуон сылларыгар бииргэ үөрэммит үөлээннээхтэрэ кэлэн, күүс-көмө, өйөбүл буоллулар, күрэхтэһии таһымын үрдэттилэр. Кини чугас доҕоро, күрэхтэһии кылаабынай судьуйата, СР хапсаҕайга федерациятын толорооччу дириэктэрэ Мостахов Алексей Егорович иккис сылын бу күрэхтэһии тэрээһинигэр көмөлөһөр.

Үөлээннээхтэрэ, СӨ народнай артыыһа Владимир Татаринов икки күн устата ылбаҕай ырыаларын бэлэхтээтэ. Спорду, физкултуураны сэҥээрэр спорт ветераннара, урукку кэмнэрин ахта-саныы, «Дьулурҕан» сытыы киирсиилэрин көрдүлэр.

Күрэхтэһиигэ Кэбээйи, Хатас орто оскуолалара, Хаҥалас улууһун түөрт оскуолатын хамаандалара бастыыр иһин кииристилэр. Бэйэни билиһиннэрии, көтөх ынаҕы туруоруу, кириэс тэбии, тутум эргиир, ойбонтон уулааһын, хабылык, хаамыска, наартаны ойуу, викторина, эстафета курдук көрүҥнэргэ күрэхтэстилэр. Уопсай түмүгүнэн, 2-c Малдьаҕар орто оскуолата эрэллээхтик бастаата, Кэбээйи орто оскуолата иккис, 2-Дьөппөн үһүскэ таҕыста.

Күрэхтэһии түһүмэхтэрин аайы улахан-ааннар хаһыытаан-ыһыытаан, ордук күүркэтэн, бэрт сэргэхтик ааста. Саха дьоно сөбүлээн истэр комментаторбыт, өр кэмҥэ «Кэскил» хаһыат эрэдээктэринэн үлэлээбит Александр Васильев-Көрдүгэн оҕолор ситиһиилэрин, ураты дьоҕурдарын кэпсээтэ. Эдэр спортсменнар хайҕабыл тылын истэн, хас биирдии түһүмэххэ улахан аренаҕа тахсардыы боччумуран, долгуйан, ордук эппиэтинэстээхтик сыһыаннастылар.

Кыайыылаахтар сыаналаах бириистэринэн наҕараадаланнылар. Валентин Васильевич кэргэнэ Светлана Павловна, уола Геннадий Валентинович 5-тии тыһыынча суумалаах харчынан бириэмийэлэрин Архипов Васяҕа (Улахан-Аан) уонна Гаврильев Никитаҕа (Тумул) анаатылар. Павлов В.В. бииргэ төрөөбүттэрэ уопсай түмүккэ үс бастыҥ хамаандаҕа 4000, 3000, 2000 солк. уу харчынан туттардылар, кыайыылаах хамаанда көһө сылдьар Кубогынан наҕараадаланна. Күрэхтэһии «Кэскиллээх кыттааччытынан» 5-c кылаас үөрэнээччитэ Борисов Эрчимэн ааттанна (Улахан-Аан). Бу күрэхтэһиигэ оскуола, нэһилиэк салалталара, Валентин Васильевич бииргэ үлэлээбит коллегалара, учуутал идэтин баһылаабыт үөрэнээччилэрэ, үөрэппит оҕолоро, тэрилтэлэр, чааһынай предпринимателлэр, аймахтар бэлэхтэрин туттардылар.

Биирдиилээн көрүҥнэргэ Улахан-Аан ыччаттара, 9-с кылаас үөрэнээччилэрэ, биир тэҥ ааттаах Архипов Васялар 215, 207 наартыны ойон, кыайыылаах аатын ыллылар, үһүскэ Тумултан Игнат Иванов таҕыста. Кыргыттарга Федорова Лилия 168 наартыны ойон, тэҥнээҕин булбата (Улахан-Аан), Булгунньахтаах үөрэнээччитэ Валя Иванова иккис, Нарыйа Степанова үһүс (2-с Дьөппөн). Тутум эргиир курдук биир уустук көрүҥҥэ чемпион үрдүк аатын 36-та эргийэн, Лиза Осипова ылла (Улахан-Аан), уолаттарга Архипов Вася 45 эргийэн, кыайыы өрөгөйүн биллэ. Хаамыскаҕа, хабылыкка бастыҥнарынан Левин Дима (Кэбээйи), Осипова Лиза ааттаннылар. «Кириэс тэбиигэ» Федорова Лилия 27-тэ ойон, кыайыылаах буолла, «көтөх ынаҕы туруоруу» көрүҥҥэ Архипов Вася 35 очколаах бастыҥынан ааттанна. Өркөн өйдөөхтөрү быһаарар викторина күрэҕэр 2-с Малдьаҕардааҕы оскуола иккис хамаанадата чиҥ билиилээҕин көрдөрдө, иккискэ кэбээйилэр, үһүскэ дьөппөннөр таҕыстылар.

Саха оҕотун өйүн-санаатын, этин-хаанын эрчийэр, сайыннарар сэргэх күрэхтэһии үрдүк таһымнаахтык ыытылынна.

Ааптар: Надежда ГРОМОВА,  Хаҥалас улууһа

0
0
comments powered by HyperComments