Ууттан дьону хас да төгүл быыһаабыт Кэбээйи энергетигэ

Бэркэ биллэр-көстөр 40 Арыы Курупааскылаах учаастагар ах­сынньы аам-даам тымныыта түһэн турдаҕына Александра Васильевна уонна Федот Николаевич Кондаков­тар­га төрдүс оҕонон уол төрөө­бүтэ. Бултаах-алтаах сиргэ төрөө­бүт оҕо чороччу улаатан аҕатын кытта тэҥҥэ сыл­дьан бултааһын, балыктааһын кистэлэҥнэригэр уһу­йуллубута. Кэлин дьоно Киччэҥҥэ көһөн киирэн кыыл иитэр фермаҕа үлэлээбит­тэрэ. Бу уол элбэх киһини ууттан быыһыыр аналлааҕа. «Дабаан» хаһыат бүгүн, энергетиктэр күннэригэр, кини туһунан кэпсиир. 

1961 сыллаахха Николай Кон­да­ков Галина Жиркова диэн кыыс­тыын ыал буолбуттара. Манна олорон Сашаны, Гошаны уонна кыыстарын Любаны оҕоломмут­тара. Онтон Ни­колай үлэлиир та­һа­ҕас та­һар баржата Арҕас сэлиэнньэтигэр ба­заланар буолан, эдэр ыаллар онно көспүттэрэ. Манна кэлэн кыра уолларын Тиманы төрөппүт­тэрэ.

Тутууга, тех­никаҕа сыстаҕас Ни­колай Федотович тэрилтэ тар­бахха баттанар биир бастыҥ үлэ­һитэ этэ. 1973 сыллаахха  “Кэбээйи” сопхуос Куокуй­даа­ҕы отделениетын управляющай Павел Егорович Павлов этиитин ылынан, олохтоох станцияҕа ди­зелиһинэн киирбитэ. Үлэтин быы­һыгар массыынанан нэһилиэнньэҕэ уу баһара. 1986 сыллаахха электростанция “Сель­энерго” бас билиитигэр киирбитэ, Николай Федотович ыстаарсайынан анаммыта. 2003 сыллаахха пенсияҕа тахсыар диэри уот си­тимигэр таһаа­рыылаахтык үлэ­лээ­би­тэ. Ити сыллар ыккардыларыгар тэрилтэ аа­та элбэхтик ула­рыйбы­та. Үлэһиттэрэ да ула­ры­­­йаллара.

Николай Федотович дьон-сэргэ убаастыыр киһитэ этэ. Кини бииргэ үлэлиир дьонугар бол­ҕомтото, кы­һамньыта, сайа­ҕас, сытыары-сым­наҕас майгыта үтүө хо­ло­бур буолар. Ону сэр­гэ нэһилиэгин уоп­сас­тыбаннай оло­ҕор, кул­тууру­най маас­­сабай тэ­рээ­һин­нэргэ өрүү кыт­тара. Кини үлэ­лиир сыл­ларыгар тэрилтэ «Бас­тыҥ үлэ­лээх кэ­лэктиип» аатын хас­та да ылбыта.

Николай Федото­вич Кон­даков элбэх киһи олоҕо была­ҕай­га былдьаныах­таа­ҕын быы­һаа­бы­т үтүөлээх. Ол маннык. Урут ки­ни­лэр Луҥха эбэ үр­дүгэр 4 кыбар­тыыралаах дьиэ­ҕэ олорбут­тара. Үрэх­­тэн чугас буо­­лан киирэ-тахса сыл­дьаллара. Биир күн ула­хан уолун Саша­ны батыһыннаран үрэххэ мотуор­да­рын оҥос­то киир­биттэр. Куйаас күн Луҥха эбэ кы­тыла, буоларын курдук, толору оҕо, улахан дьон буолааччы. Бу да күн оҕо ай­мах мустан, сөтүөлээн булумах­таһыы бөҕө үһү. Биир кыыс оҕо үрүллүбүт курууктаах сыл­дьыбыт. Онтон Саша эмискэ: «Оҕо ууга түс­тэ», – диэбит да, ууга ыстанан кэ­биспит, Нико­лай уолун кэнниттэн ­ыстаммыт уонна ку­руу­гуттан мүлчү туттан ууга был­дьана сыспыт оҕону быыһаан та­һааран дьонугар туттар­быттар.

Иккис түгэн. Ни­колай Федотович трак­торга үлэ­лии сылдьан Тэтиҥ Аппа учаас­тагар биир киһи тракто­ры­нан ууга түспүтүн түбэһэ түһэн таһаарбыт. Онтон биир сайын 3 киһини ууттан быы­һаабыт. Тыаллаах баҕайы күн мо­туор­даах дьон ууга түспүттэрин ис­тээт үрэххэ киирэн мотуорунан ыстан­наран тиийбит уонна оҥочолорут­тан тутуһа сыл­дьар дьону биир-биир бэйэтин оҥочотугар соһон таһаар­таа­­быт.

Николай Федотович көрсүө-сэ­мэй, хаһан да кэп­сэнэ сылдьыбат, көнө майгылаах киһи этэ. Ити бы­һылаан кэнниттэн Николай Федо­товиһы «Ууга түспүт дьону быыһаа­һын иһин» диэн мэтээлинэн на­ҕараадалаа­быттар. Аҥардас кини Киччэҥ­нээҕи олоҕо, үлэтэ-хамнаһа, он­тон уот ситимигэр таһаарыылаах үлэ­тин сыллара тиһигин быспат кэп­сээн буоллаҕа.

Ааптар: Татьяна Максимова-Лазарева