Силиэстийэ уорганнара Уус Маайа улууһун Эдьээн, Эльдикан, Күп нэһилиэктэрин дьаһалталарын дуоһунастаах үлэһиттэригэр «Дьалаҕай быһыы» ыстатыйанан холуобунай дьыала тэрийдилэр. Бу нэһилиэктэр ууга барар кутталлаахтарын туһунан эрдэттэн сэрэппэтэхтэрин иһин.
Силиэстийэ дааннайынан, Уус Маайа сиригэр-уотугар ыам ыйын 9 күнүн түүнүгэр, Алдан өрүскэ муус хамсаабыт. Маныаха Эдьээн, Эльдикан, Күп нэһилиэктэригэр муус харара сабаҕаламмыт, ол аата ууга барар куттал үөскээбит.
Ыам ыйын 10 күнүгэр Уус Маайа улууһун баһылыгын эбээһинэһин толорооччу ыксаллаах быһыыны-майгыны биллэрэн, муниципальнай тэриллиилэр дуоһунастаах үлэһиттэрэ бэлэм буолалларыгар ыйыы-кэрдии бэриллибит.
Ыам ыйын 10 күнүттэн 15-гэр диэри кэмҥэ быһыы-майгы ыараан, ити нэһилиэктэр ууга баран, дьон баайа-мала эмсэҕэлээбит, доруобуйатыгар, олоҕор куттал үөскээбит.
Бүгүҥҥү, ыам ыйын 17 күнүнээҕи туругунан, ити үс нэһилиэккэ 582 дьиэ, 1217 киһи, ол иһигэр, 314 оҕо олорор 287 чааһынай тутуу ууга баран олорор.
Бу туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: Марианна Караканова, «Усть-Майский вестник».
