Билиҥҥи балысхан сайдыылаах 21-с үйэ дьоно дьылҕабытын санаа сүдү күүһэ салайарын билэбит. “Мысли материальны” – диэн тылы күннэтэ истэбит. Ити туһунан улуу суруйааччыларбыт, учуонайдарбыт, олохторугар улахан ситиһиилэммит дьоммут эппиттэрин элбэҕи ааҕыахха, истиэххэ сөп. Уус Алданнааҕы “Мүрү саһарҕата” хаһыат уонна полиграфия айар холбоһуга кэлэн иһэр саҥа дьылынан Саха сирин олохтоохторугар анаан, “Баҕа санаа түсчүтэ” диэн 2019 сыллаах халандаары оҥордо.
Уус алданнар бэртээхэй халандаар оҥорон таһаардылар. Куруук үчүгэйи ыралыыр киһи этэҥҥэ, үчүгэйдик олорор, кини санаата куйаарга тиийэн бэйэтин олоҕор төннөр диэн үөрэх муударай кытай омугуттан бары норуокка тарҕанна. Ураты халандаар киһи тугу баҕарарын хараҕын далыгар олохсутан, ону толорорго өйүн-санаатын түмэн болҕомтотун туһаайарыгар көмөлөһүөҕэ.
Халандаар кэмпилиэгэр баай-дуол, дьиэ кэргэн, доруобуйа, үлэҕэ ситиһии, таптал курдук араас хайысхаларга наардаммыт үгүс хартыыналардаах. Халандаар хаһаайына бэйэтэ тугу баҕарарын талан, ыра санаа түсчүтүн оҥорон, аан дойдуга, куйаарга, үрдүкү күүстэргэ баҕа санаатын тиэрдэр.
Төгүрүк сылы быһа ону көрө сылдьан санаатын күүһүнэн тугу баҕарбыта туоларыгар олук уурар. Халандаары үтүөнү баҕарар чугас киһигэр бэлэхтээн, кини баҕалара, былааннара туоларыгар күүс-көмө буолуохха сөп.
Ааптар: Мария Аргунова
