29 Кулун тутар 29.03
  • -12°
  • $ 92,26
  • 99,71

Уус Алдан уолун хорсун быһыыта сыаналанна

14:02, 25 декабря 2018
Текст:
Читайте нас на
Яндекс Новости
ЯДВ

Өспөх нэһилиэгин олохтооҕо, транспорт техникумун устудьуона  Кирилл Иванов Ил Дархан илиититтэн «За спасение погибавших» РФ Государственнай наҕараадатын тутта. Кини өссө 2016 сыллаахха, 10-с кылааска үөрэнэ сылдьан, ууттан үс киһини быыһаан турар. Уолчаан ол быһыытын улахан дьоруойдуу быһыы курдук санаабат: ханнык баҕар эр киһи ити түгэҥҥэ атыннык дьаһаммат диир. 


Уус Алдантан сылдьар устудьуон Кирилл Иванов икки сыл анараа өттүгэр оҥорбут үтүө быһыыта хойутаан да буоллар, сыаналанна.  Уолларынан ордук биир дойдулаахтара киэн тутталлар,  күн сирин үтүөтүн барытын баҕараллар. Кирилл бэйэтэ улаханнык дьоруой курдук санаммат. Ол эрээри ууга былдьанан эрэр дьону быыһыырга киһи эрэ соруммат. Манна лаппа кыахтаах, сатабыллаах уонна харса суох буолуохха наада.

2016 сыл бэс ыйын 19 күнүн түүнүгэр Алдан өрүскэ мотуорканан айаннаан иһэр дьоҥҥо эмискэ өлөр-тиллэр түгэн суоһаабыта. Ити түүн хомойуох иһин, алта киһиттэн икки киһи сырдык тыына быстыбыта. Ол Өспөх нэһилиэгин дьаһалтатын баһылыга Анатолий Румянцев, уонна кини кэргэнэ, уһуйаан спорт инструктора – Евдокия Борисова этилэр.

Өспөх нэһилиэгиттэн биэс киһилээх дэлэгээссийэ Дүпсүҥҥэ тиийэн Күлүмнүүр 150 сылыгар аналлаах улахан ыһыахха кыттыбыттара. Кинилэр ортолоругар Өспөх оскуолатын 10-с кылааһын үөрэнээччитэ Кирилл Иванов “Дүпсүн боотура” күрэскэ илин-кэлин түһүспүтэ. Киэһэ Чэриктэйинэн эргийэн мотуорканан айаннаан дойдуларын булуохтаахтара. Куораттан айаннаан иһэр Кирилл аҕата кинилэри кытта барсар буолбута. Чэриктэй нэһилиэгэр тиийэн мотуорканан айаннаан истэхтэринэ мотуорка умуллан, уу киирэн Эбэ үөһүгэр тыын былдьаһыга буолбута. Өлүү түбэлтэлээх, ити күн тыаллаах буолан, өрүс долгуна өрө ытыллан олороро. Сүүрүккэ оҕустаран, сэниэлэрэ эстэн тимирэ-тимирэ күөрэйэр дьону Кирилл уол хоннохторуттан харбаан таһаарара, дьонун хамаандалаан, күүстэригэр күүс эбэн олох кытылын булларбыта. Ити курдук, хорсун-хоодуот уол үс киһини, аҕатын уонна икки дьахтары өлөр өлүүттэн быыһаан үрүҥ тыыннарын өрүһүйбүтэ. Быыһаммыт дьон Кирилл күүстээх санаатын, оҕо киһиэхэ эрчимин сөҕөн туран, хаһыат нөҥүө муҥура суох махтанан турардаахтар.

Бу дьыл ахсынньы 24 күнүгэр транспорт техникумун устудьуона Кирилл Иванов СӨ Ил Дархана Айсен Николаев илиититтэн “За спасение погибавших” диэн РФ Государственнай наҕарааданы тутта. Биһиги кэккэбитигэр маннык хорсун, үтүө санаалаах киһи киһитэ дьон баарыттан киэн туттуох, холобур оҥостуох тустаахпыт.

Кирилл Ивановтан санаатын бу курдук үллэһиннэ: ”Ити сыл миэхэ наһаа ыараханнык ааспыта. Ийэм соһуччу суох буолбута үс эрэ ый ааспыт кэмэ этэ. Өссө ити быһылаан өйбүн-санаабын аймаабыта. Дьоҥҥо этиэм этэ, өрүскэ мотуорунан сылдьар буоллаххытына хайаан да жилетта кэтиҥ, эҥин араас түгэн буолуон сөп. Олоххутун харыстааҥ. Хорсун быһыым иһин төрөппүттэрбэр эрэ махтаныах тустаахпын, кинилэр миигин күүстээх эр санаалаах гына ииппиттэригэр. Төрөппүттэрбинэн киэн туттабын”. Кирилл билигин үөрэнэрин таһынан спордунан дьарыктанар, ордук хайыһарга уонна волейболга ситиһиилэрэ элбэх.

Ааптар: Мария АРГУНОВА

Следите за самым важным и интересным в Telegram-канале и WhatsApp-группе ЯСИА