Биллиилээх сэбиэскэй экстрасенс, артыыс Вольф Мессинг соҕотох үөрэнээччитин Ольга Мигунова олоҕун туһунан кэпсиир «Ученица Мессинга» диэн 16 сериялаах киинэ соторутааҕыта «Бастакы ханаалга» көстөн бүттэ. Киинэҕэ Саха сириттэн Мария Егоровна Фомина уһуллубута.
Сериалга Ольга Саха сиригэр гастроллуу кэлэн баран, кырдьаҕас удаҕаны көрсөр. Бу удаҕан оруолугар Уус Алдан улууһун Мүрү сэлиэнньэтин олохтооҕо Мария Егоровна Фомина уһуллубута.
Уус Алдан улууһун бочуоттаах олохтооҕо, тыыл, үлэ бэтэрээнэ түөрт сыл анараа өттүгэр, 86 саастаах сылдьан, бу киинэҕэ удаҕан оруолун толорбута. Ол киинэтэ быйыл «Бастакы ханаалга» көстөн түмүктэннэ. Улуус дьоно-сэргэтэ күннэтэ алтыһар киһилэрэ, маннык эппиэтинэстээх оруолга уһуллан, киэҥ эйгэҕэ биллибитин олус үөрэ көрсөн, киинэни көтүппэккэ көрдө.
Киинэ сүрүн дьоруойа айылҕаттан ураты айдарыылаах Ольга Мигунова төрөппүт кыыһа улаханнык ыалдьан, хоту дойдуга, чуолаан сахаларга кыыскын үтүөрдэр күүһү булуоҥ диэбиттэрин истэн көрдүү кэлэр. Ураты күүстээх удаҕан бэйэтин күүһүн биэрэр сиэри-туому толорорун Мурманскай уобалас Оленегорск куоратын аттынааҕы улахан күөлгэ устубуттар.
«Уопсайа түөрт күн устата уһуллубутум. Итинник улахан, уһун киинэ буолуо дии санаабатаҕым. Мин 14-с сиэрийэтигэр уһун баҕайытык көһүннүм. Устуу араастаах буолааччы, онон табыллар дуу, табыллыбат дуу дии саныырым. Көрөн баран бэйэм астынным. Үчүгэй баҕайытык устубуттар уонна оҥорбуттар», — диэн Мария Фомина кэпсээтэ.
Бу иннинэ Мария Егоровна “Үрүҥ күн” диэн режиссер Михаил Лукачевскай киинэтигэр уһуллан, эмиэ үрдүк сыанабылы ылбыта. Онтон салҕыы режиссер Россия таһымыгар мэктиэлээн, бүтүн Россиятааҕы бырайыакка кылгас да буоллар, чаҕылхай оруолун толорон кэлбитэ. Хартыына Мария Фомина 90 сааһын туолар үбүлүөйдээх сылыгар күөх экрааҥҥа тахсан, үйэлээх бэлэх буолла.
