Олунньу ый 17-19 күннэригэр Бороҕоҥҥо Олоҥхо дьиэтигэр улуустааҕы култуура управлениетын (начальник Иннокентий Аммосов) ыҥырыытынан Хаҥалас улууһуттан норуот маастара Семен Черноградскай кэлэн туоһунан тигиигэ маастар-кылааһы ыытта.
Уус Алдан улууһутуттан өрөспүүбүлүкэҕэ биир бастакынан норуот маастара ааты ылбыт ийэ туосчут Мария Михайловна Черноградская удьуорун утумнаан, кини төрөппүт уола, туоһунан тигиигэ Саха сиригэр тарбахха баттанар маастар Семен Степанович биир дойдулаахтарыгар үс күн устата ыыппыт маастар-кылааһыгар барыта 14 киһи сырытта. Кинилэр аан бастаан туоһунан тигии кистэлэҥнэрин арыйан, үс күн устата үөрэнэн, бэйэлэрин бастакы оҥоһуктарын — ыаҕайалары оҥордулар, маастарга махталлара муҥура суох, диэн СИА-ҕа кэпсээтэ Уус Алдан улуустааҕы култуура управлениетын специалиһа Анна Федорова.
