Уус Алдан улууһун Бороҕон нэһилиэгэр баһаарынай дружина үлэтин саҕалаата. Муниципальнай тэриллии солбуйар баһылыга Албан Стрекаловскайы, баһаарынай дружина начальнига Алексей Аржаковы кытта көрсөн кэпсэттибит.
Албан Иннокентьевич кэпсээбитинэн, дружина тэриллэригэр дьаһалта өттүттэн көмө көрүллүбүт. Бастатан туран — үлэлиир миэстэ. Дьаһалта дьиэтигэр анал биир хоһу биэрэн, толору үлэлиир усулуобуйаны тэрийбиттэр.
«Нэһилиэккэ баһаарынай дружина тэриллэн үлэлээбитэ ыраатта. Кэнники сылларга улууска ыытыллар баһаарынай доброволецтар күрэхтэригэр куруук инники күөҥҥэ сылдьан, кубогынан, сыаналаах бириистэринэн наҕараадаламмыппыт», — диэн бэлиэтиир Алексей Аржаков.
«Уопсай сорукпут диэн нэһилиэккэ ууттан, уоттан сэрэхтээх буолууга сэрэтии үлэтин ыытыы. Ону таһынан тэрилтэлэргэ, уопсай дьиэлэргэ инструктаж, учениелары ыытыы. Салайааччы, Алексей, 2015 сылга улуус киинигэр киирэн «Эдэр байыас» курсугар үөрэнэн кэлбитэ. Бэйэ икки ардыгар күрэх, нэһилиэк иһигэр ыытыллар тэрээһиннэргэ дьуһуурунайдааһын», — диэн кэпсиир Албан Стрекаловскай.
Инники былааннара — ситимин быспакка улуус, өрөспүүбүлүкэ ыытар күрэхтэригэр, грант конкурстарыгар кыттыы.
Санатан эттэххэ, Уус Алдан улууһун Бороҕон нэһилиэгэ 3 нэһилиэнньэлээх пууннаах: Тумул, Элэһин, Арыы-Тиит. Уопсайа тыһыынчаттан тахса киһи олорор дойдута.
Маннык киэҥ сири хабан сытар нэһилиэккэ баһаарынай депо наадалаах диэн, дьаһалта баһылыга Василий Алексеев 3 сылтан ордук сүүрэн-көтөн, туруорсан, бүгүҥҥү күҥҥэ үлэ түмүгэ — 10 киһиэхэ өрөспүүбүлүкэ үбүлээн анал форма, оборудование кэлэн, дружинник уолаттар санаалара өссө көтөҕүлүннэ.
