Айыы эбэтэр Аньыы дьон буккуйар тыла. Айыы сырдык күүстэри кытта ситимнээх өйдөбүл, аньыы хараҥа күүстэр, дьайдар абылаабыт тыллара буолар. Уус Алдан Мүрү нэһилиэгэр Екатерина Прокопьевна Свинобоева режиссердаан «Айыы эбэтэр Аньыы» диэн бастакы мюзиклы сыанаҕа дьон дьүүлүгэр туруорда.


Мүрүгэ Екатерина Свинобоева мюзикла дьон сэҥээриитин ылла. Артыыстар, үҥкүүһүттэр үгүстэрэ ыччаттар. Төһө да бастакы мюзикл уонна артыыстара идэтийбит дьон буолбаталлар, олус үчүгэйдик оонньоотулар. Айымньы ис толкуйун, өйдөбүлүн дьоҥҥо тиэртилэр. Көрөөччүлэр хас биирдии көстүүнү ытыс тыаһынан көрсөллөр.

Мюзикл нөҥүө ааптар Екатерина Прокопьевна уонна артыыстар көрөөччүлэргэ икки суолу тиэрдэллэр. Айыы уонна аньыы диэн тыллары араарарга үөрэтэллэр. Маны кэккэ, аньыы диэн тылы кытта ситимнээн – арыгыны, наркотигы, куһаҕан дьайдары көрдөрөллөр. Ол эбэтэр, арыгыһыт, наркоман киһи саха сиэригэр, итэҕэлигэр сөп түбэспэт аньыыны оҥорор. Бу дьаллыктарга үксүгэр олох ыарахаттарын, күчүмэҕэйдэрин кыайан тулуйбатах дьон ылларарын көрдөрдүлэр.

«Айыы эбэтэр Аньыы» мюзиклы оскуоланы бүтэрээри сылдьар оҕолорго көрдөрөр тоҕоостоох уонна маннык сэдэх сыана жанра өссө да турара буоллар диэн санаа үөскүүр. Оттон бу туруоруу өссө да элбэхтик улахан сыанаҕа тахсар кэскиллээх.

Ааптар: Айаал МОЛОКОТИН

0
0
comments powered by HyperComments