Усуйаана хоһууна Бииктэр Горуохап хас күһүн аайы, балаҕан ыйыгар биригээдэ тэринэн күндүөбэйгэ турунар. Булдун үксүн Черепенина Дульфия Миосаровна салайааччылаах “Фактория и К” тэрилтэ балыгы астыыр сыаҕар туттарар.
Бу күннэргэ Усуйаана олохтооҕо Бииктэр Горуохап күһүҥҥү балыктааһынын саҕалаата, былаанын толороругар бүк эрэллээх. Хас да сыл алтыһан Дульфия Миосаровнаны кытта биир тылы буллулар, хардарыта барыстаахтык үлэлииллэр.
Биирдэ эмит улуус киинигэр кэллэҕинэ, Дьокутааскай бөһүөлэк устун тиэтэйэ-саараайа хаамарын элбэхтик көрүөххэ сөп. Кини аймахтарын, доҕотторун, биир дойдулаахтарын үгүс элбэх докумуоннарын сырсыытыгар бириэмэтин барыыр. Бииктэр Горуохап бэйэтэ олох түһүүтүн-тахсыытын этинэн-хаанынан билбит киһи. Эдэр сылдьан олох очуругар оҕустаран икки атаҕын быстарбыта. Ол да буоллар, күүстээх санаатынан киһи-хара буолар туһугар сырдык олох иһин охсуспута. Бииктэр, дьылҕа-хаан төһө да эрийдэр-мускуйдар, хаһан да санаатын түһэрбэт, күлэн-үөрэн, хаадьылаһан холобурга сылдьар доҕор.
Бииктэр Ньукулаайабыс ырыынак ыар тыына ыкпытыгар, бэйэлэрин төрүттэрин сирин ылан “Уочаракаан” диэн балыктааһынан дьарыктанар кэпэрэтиип тэриммитэ. Ону кытта Дьааҥы өрүскэ күндүөбэйдиир учаастак ылан Кириэс бөһүөлэк утары муҥхалыыр сир оҥостубута. Кини күндүөбэй хаамыытын саҕана соругун ситиспэтэҕэ суох.
Ааптар: «Заря Яны» хаһыат, ulus.media
