СӨ Ил Дархана Егор Борисов тутуу этэрээттэр ахсааннарын элбэтэр, бу хамсааһын үлэтин улаатыннарар, кэҥэтэр туһунан устудьуоннар тутар этэрээттэрин сайыҥҥы сезонун түмүктүүр үөрүүлээх тэрээһиҥҥэ чопчулаан бэлиэтээтэ.
Кэлэр 2016 сыл Ыччат сылынан биллэриллэн, эдэр дьону үгүс бырайыактар, араас тэрээһиннэр кэтэһэллэр. Егор Борисов СӨ бырабыыталыстыбата тутар этэрээттэр хамсааһыннарын улаханнык өйүүрүн этэн туран: «Устудьуоннар тутуу этэрээттэрин хамсааһына — бу олох уонна үлэ оскуолата. Үлэлиэн-хамсыан баҕарар ыччат бу оскуоланы хайаан да ааһыахтаах. Биһиги баай сирдээх-уоттаах дойдуга олоробут. Ону туһаҕа тааһарарга үөрэниэхпитин наада. 2030 сылга диэри социальнай-экономическай сайдыы стратегиятын олоххо сатаан киллэрэр ыччаттаах буолуохтаахпыт», – диэн бэлиэтээтэ.
Өрөспүүбүлүкэ аҕа баһылыга мустубут хамыһаардары, хамандыырдары, байыастары унньуктаах үлэ түмүктэммитинэн итиитик-истиҥник эҕэрдэлээтэ уонна махтал суруктары туттартаата.
Үөрүүлээх тэрээһиҥҥэ СӨ ыччатын уонна дьиэ кэргэнин дьыалаларыгар министирэ Афанасий Владимиров, М.К.Аммосов аатынан Хотугулуу-Илиҥҥи федеральнай университет ректора Евгения Михайлова, Дьокуускай куорат баһылыгын эбээһинэһин толорооччу Дмитрий Садовников, СӨ устудьуоннарын тутар этэрээттэрин аатыттан Айсен Соловьев уонна да атыттар кыттыыны ыллылар.
Сайыҥҥы түһүмэх түмүгүнэн, Тыа хаһаайыстыбатын академиятын ректорын этэрээтэ – «СӨ бастыҥ тутар этэрээтинэн» ааттанна.
