Полиция оперативниктара өрөспүүбүлүкэ араас муннуктарыгар тахсыбыт уоруулары арыйдылар. Бу туһунан СӨ ИДьМ-тын пресс-сулууспата иһитиннэрэр.
Мирнэйгэ. Ааспыт сыл атырдьах ыйын 18 күнэ үүнэр түүнүгэр суотабай сибээс маҕаһыыныттан мөлүйүөн кэриҥэ сууманы уорбуттар. Уоруйахтар маҕаһыын аанын, түннүгүн алдьатан киирэн, “подсобкаҕа” турбут сейфэни кураанахтаабыттар. Муостаҕа тохтубут бензин уоттан күүдэпчилэнэн умайан, буруй суолун-ииһин суох оҥорбут.
Бу буруйу арыйыыга Мирнэйдээҕи полиция оперативниктара түүннэри-күннэри үлэлээн, сыл саҥатыгар уорбаланааччы суолун таба тайаммыттар – Үөһээ Бүлүүттэн төрүттээх, урут сууттана сылдьыбыт 24 саастаах олохтооҕун дойдутуттан тутан, Мирнэй куоракка аҕалбыттар.
Уорбаланааччы быһаарбытынан, уорарга кинини маҕаһыын хаһаайката “өй укпут”. Кини дьахтар эрин билэр, маҕаһыыҥҥа сылдьар эбит. Биир “үтүө” күн дьахтар элбэх харчыны өлөрөргө этии киллэрбитигэр, сөбүлэспит. Нэдиэлэ устатыгар маҕаһыын хаһаайката 980 тыһ. солк. сууманы мунньан, ону араас сылтаҕынан инкассатордарга биэрбэккэ сылдьыбыт. Уонна болдьоспут күннэригэр сейфэни аһаҕас хаалларан барбыт.
Уоруу оҥоһуллубутун кэнниттэн, уорбаланааччы Мирнэйтэн барбыт, маҕаһыын дириэктэрэ үлэтиттэн уурайбыт, уоруллубут харчыны үллэстэн, тус наадаларыгар туттубуттар. Уорбаланааччы быстах кэмҥэ изоляторга хаайылынна, 28 саастаах дьахтарга хаарчахтыыр миэрэ быһыытынан, ханна да барбат баппыыска туттуллан, көҥүлгэ сылдьар.
Дьокуускайга. Сейфэттэн докумуоннары уонна 200 тыһ. солк. суумалаах ювелирнай оҥоһуктары уоруу былырыын алтынньы ый ортотугар киин куорат таһынааҕы Пригороднай бөһүөлэгэр тахсыбыт. Хаһаайыттар күнүс 16.00 чаас саҕана дьиэлэригэр кэлбиттэрэ – сейфэлэрэ суох. Уоруйах стеклопакет түннүгү арыйан киирбит. Бэрчээккэлээх “үлэлээбит” буолан, туох да суолу-ииһи хаалларбатах. Нерюнгриттан төрүттээх 40 саастаах уорбаланааччы билиммитинэн, кыахтаахтык олорор дьон дьиэтин анаан кэтээбит-манаабыт. Уоруллубут былдьанна.
Соторутааҕыта “Полярная звезда” гостиница баарыттан биир дьахтар суумкатын уорбуттар. Суумкатыгар 4500 солк. харчылааҕа үһү. Уоруу, дьахтар суумкатын хаалларан тахсан барбыт кэмигэр, оҥоһуллубут. Уорбаланааччыны туппуттар – урут уорууга түбэһэн, сууттана сылдьыбыт, Иркутскай уобаластан төрүттээх 59 саастаах ханна да үлэлээбэт киһи.
Итиниэхэ маарынныыр түбэлтэ, эмсэҕэлээччи бэйэтин дьалаҕайыттан тахсыбыт уоруу, тохсунньу ортотугар Лермонтов уулуссатыгар баар хаартысканан дьарыктанар кииҥҥэ буолбут. Бу киин дириэктэрэ бартыбыалыгар 32 тыһ.солк. уктубут уонна быстах тахсан барбыт, кэлбитэ – харчыта мэлигир. Уорууга уорбаланан, урут бу кииҥҥэ үлэлээбит, ити күннэргэ быстах үлэлэһэ сылдьыбыт, Намтан төрүттээх 25 саастаах киһи тутулунна. Уоруллубут сууманы төлөөбүт.
Горнайга. Ааспыт сыл алтынньы ыйыгар оҕо саадын иитээччититтэн “Самсунг” суотабай төлөпүөнүн уорбуттар. Саатар полицияҕа тута тыллаабакка, бастаан бэйэтэ көрдүү сатаабыт. Ол кэмҥэ уоруйах төлөпүөнү Дьокуускайга интернетинэн атыылаабыт. Уорбаланааччыны туттулар – ити оҕо саадыгар музыка уруогун үөрэтээччи эбит.
Сунтаарга. Сунтаар сэлиэнньэтин олохтооҕун баанын каартатыттан 6 тыһ.солк. уорбуттар. Уорууну суукка иһинэн арыйбыттар — харчы устарыгар аттыгар турбут билэр дьахтара эбит. Пин-кодун нүөмэрин өйдөөн хаалбыт уонна каартаны эр киһи портмонетыттан уоран, харчыны уста охсон, төттөрү уган кэбиспит. Дьахтары билэр киһитин дьиэтиттэн туппуттар, харчыта сороҕо баар, сороҕунан арыгы атыыласпыт.
Баан каартатыттан уорууга сыһыаннаах түбэлтэ Дьокуускай куоракка тохсунньу бүтүүтүгэр тахсыбыт. Биир киһи банкоматтан харчы устара табыллыбакка, каартата хаалан хаалбытын, тиэтэйэн ылбакка барбыт. Ону кини кэнниттэн кэлбит киһи ол каартаны ылан, бородуукта маҕаһыыныттан ас-үөл атыыласпыт. Оперативниктар уорбаланааччыны үлэлиир сириттэн, электрическэй табаардары атыылыыр маҕаһыынтан, туппуттар. Каартаттан 3 тыһ.солк. сууманы тутта охсубут.
Бу чахчыларынан “уоруу” ыстатыйанан холуобунай дьыалалар тэрилиннилэр.
