«Амма ыччатын кырдала» уопсастыбаннай тэрилтэ Амма өрүс научнай-экологическай экспедиция иккис түһүмэҕин тэрийэн ыытта. Саҕалааһыны айылҕа харыстабылын министиэристибэтэ, Наука академията өйөөтө.
Экспедиция кыттыылаахтара Амма өрүстээх Чурапчы, Таатта, Амма улуустарыгар сылдьан өрүс гидрохимическэй састаабын чинчийдилэр.
Саввинов Дмитирий – биологическай наука доктора, профессор, Кулаковская Людмила – Кулаковскай институтун дириэктэрэ, Неустроева Саргылана–профессор, Руфова Алена – Наука академиятын үлэһитэ, Захаров Андрей – фотограф экспедиция састаабыгар киирдилэр.
Научнай салайааччы Дмитрий Саввинов экологическай хамсааһын, научнай чинчийиилэр, Дмитрий Емельянов, Василий Фёдоров уонна Ольга Иванова-Сидоркевич олохторун, айар үлэлэрин тустарынан кэпсээтэ.
Тэрээһин кыттыылаахтара бэлиэ сирдэргэ сырыттылар. «Хас биирдии сир-уот туспа, ураты эниэргийэлээх, историялаах, номохтоох. Ол да иһин, киһи хараҕар көстүбэт сэтиинэн тулалыыр эйгэни, дьону кытта ыкса ситимнээхтэр. Ыраас, толору уулаах Аммата суох Алдан суох. Оттон Алдана суох Өлүөнэ өрүс эмсэҕэлиэн сөп», — дииллэр кыттыылаахтар.
Бу үлэ түмүгэр уу 14 боруобатын ыллыбыттар, өрүс балыгын үөрэппиттэр.
