28 Кулун тутар 28.03
  • -13°
  • $ 92,59
  • 100,27

Уон биэстээх кыыс, 72 уонна 61 саастаах кырдьаҕастар суол быһылааныгар эчэйбиттэр

18:35, 18 января 2017
Текст:
Читайте нас на
Яндекс Новости
ЯДВ

Халлаан тымныйан туманыран, тимир көлөнөн түргэнник айаннааччылар дьону түҥнэри көтүүлэрэ элбээбитин туһунан ГАИ үлэһиттэрэ этэллэр. Манна туман эрэ буруйдаах буолбатах. Халлаан былытыран кыраһалаатаҕына, суол халтараан буолан, түргэнник сылдьааччылар кыайан туормастаабакка хаалар түгэннэрэ эмиэ элбэх диэн edersaas.ru иһитиннэрэллэр.


Суоппардар  наһаа түргэнник сылдьаллар

Манна сыһыаннаах СТБ-тан (суол-тырааныспар быһылаана) билиһиннэрэр буоллахха, тохсунньу 12 күнүгэр сарсыарда 8 чаас саҕана Автодорожнай уонна Дежнев уулуссалар быһа охсуһууларыгар «Тойота Ист» массыына суоппара ДСК оройуонун өттүттэн айаннаан иһэн, 15 саастаах кыыс оскуолатыгар баран иһэрин түҥнэри көппүтэ.

Суоппар саахал кэмигэр арыгы испэккэ сылдьыбыт. Быһаарыы суругар: «Уулуссалар быһа охсуһууларыгар чугаһаабыппар, иннибэр айаннаан испит массыына тохтообутугар, саайымаары уҥа балаһаҕа тахсыбытым. Туормастаан тимир көлөбүн тохтото сатаабытым, ол кэмҥэ сатыы сылдьааччыларга светофор көҥүл уота тыкпытыгар дьон тахсан биэрбитигэр, кыыһы түҥнэри көппүтүм», – диэн суруйбут.

Анна Жегусова, Дьокуускайдааҕы ГАИ пропагандаҕа иниспиэктэрэ:

Тохсунньу 12 күнүгэр сарсыарда 8 чаас саҕана Автодорожнай уонна Дежнев уулуссалар быһа охсуһууларыгар тахсыбыт суол быһылааныгар полиция үлэһиттэрэ административнай дьыала оҥорон буруйдааҕы быһаара сылдьаллар. Биллэн турар, суоппар халтараан суолга сэрэммэккэ, түргэнник айаннаабытын түмүгэр, кыыс эчэйиини ылбыт. Иккиһинэн, сатыы сылдьааччы уулуссаны туоруон иннинэ тула өттүн үчүгэйдик көрүнэн баран туораабыта буоллар, итинник быһылаан тахсыа суоҕа этэ.

Сатыы сылдьааччылары түҥнэри көтүү үксүн халлаан хараҥатыгар буолар. Онон аһара туманнаахха уонна хараҥаҕа соҥҥутугар, суумкаҕытыгар (ордук оҕолорго) уоту тэйитэр анал элэмиэннэри сыһыараргытыгар сүбэлиибин. Оччоҕуна суоппардар ону эрдэ көрөн туормастыа  этилэр. Итинник анал элэмиэннэри почта салааларыгар, канцелярия уонна хаһаайыстыбаннай маҕаһыыннарга атыылыыллар. Итини оҕо ыстааныгар эбэтэр суумкатыгар тигиэххэ сөп.

Сатыы сылдьааччылар эмиэ буруйдаахтар

Иниспиэктэр Анна Жегусова этэринэн, сорох сатыы сылдьааччылар бэйэлэрин буруйдарыттан тимир көлөҕө киирэн биэрэллэр эбит. Тохсунньу 14 күнүгэр күнүс 72 уонна 61 саастаах кырдьаҕастар Бүлүүлүүр аартык 3 км суолу көҥүлэ суох сиринэн туораан, «УАЗ» массыынаҕа киирэн биэрэн, эт-сиин эчэйиитин ылбыттар. Суолу туораан истэхтэринэ, Объездной шоссе диэкиттэн (куорат өттүттэн) хаҥас балаһанан айаннаан испит массыына суоппара дьону көрөн тохтоон биэрбитигэр, сатыы сылдьааччылар сүүрбүттэр. Онуоха уҥа балаһанан иһэр массыына суоппара дьону хойут көрөн, түҥнэри көтүмээри уҥа салайбыт даҕаны син биир иккиэннэрин «таарыйан» ааспыт.

Өссө биир сатыы сылдьааччы буруйуттан тохсунньу 15 күнүгэр СТБ тахсыбыт. Горькай уулусса 92 №-дээх дьиэтин аттыгар 44 саастаах итирик туруктаах эр киһи суолу көҥүлэ суох сиринэн туораан истэҕинэ, кимэ биллибэт суоппар түҥнэри көтөн баран куоппут. Быһылааны көрбүт дьон «Суһал көмөнү» ыҥыран, улахан эчэйиини ылбыт киһини өрүһүйбүттэр. ГАИ үлэһиттэрэ куотааччыны тараччы тутан ылбыттар. Суоппар быһылаан миэстэтиттэн куоппутунан сибээстээн, административнай эппиэтинэскэ тардыллар. Буруйдаах, суут быһаарыытынан, 1-тэн 1,5 сылга диэри тимир көлөнү ыытар бырааба быһыллар эбэтэр 15 сууккаҕа хаайыллар. Дьиҥэр, буруйдаах сатыы сылдьааччы.

Статистика көрдөрөрүнэн, 2016 сылга Дьокуускай куоракка 166 сатыы сылдьааччы кыттыылаах СТБ тахсыбытын түмүгэр, 10 киһи суорума суолламмыт, 165 киһи араас эт-сиин эчэйиитин ылбыт. Мантан 55 СТБ тахсыытыгар сатыы сылдьааччылар буруйдаахтар.

Сатыы сылдьааччылары түҥнэри көтүү үксэ халлаан хараҥатыгар буолбут. Дьокуускай куораттааҕы суолга-иискэ куттал суох буолуутун иниспиэксийэтэ  уулуссаны анал ыйыллыбыт сирдэринэн уонна тула өттүгүтүн үчүгэйдик сыныйан көрүнэн баран туоруургутугар сүбэлиир. «Таҥара сэрэҕи таптыыр» диэн мээнэҕэ эппэттэр.

Следите за самым важным и интересным в Telegram-канале и WhatsApp-группе ЯСИА