Университекка бүддьүөттэн үбүлэнэр миэстэҕэ сайабылыанньалары ылыы саҕаланна

0
64

ХИФУ үөрэх салааларын деканаттарыгар бүддьүөттэн үбүлэнэр миэстэлэргэ көһүөн баҕалаах устудьуоннартан сайабылыанньалары ылыы саҕаланна. Бу туһунан университекка үөрэх хаачыстыбатын хааччыйар Департаментан үөрэххэ көһөрүү боппуруоһунан дьарыктанар салааны салайар Варвара Матвеева иһитиннэрдэ.


«Аһаҕас миэстэ баар буоллаҕына, үөрэхтэригэр ситиһиилээхтэр көһүөхтэрэ. Биир эрэ миэстэ баар буоллаҕына, тус ситиһиилэр эмиэ учуоттаналлар», – диир кини. Киирбит сайабылыанньалары анал хамыыһыйа сиһилии ырытан, сыаналаан көрөр. Маннык миэстэҕэ туйгун, үчүгэй үөрэхтээх устудьуоннар, тулаайахтар, төрөппүт көрүүтэ суох хаалбыт оҕолор, ону сэргэ, I группалаах инбэлиит төрөппүттээхтэр сайабылыанньалара көрүллэллэр.

Бүддьүөттэн үбүлэнэр миэстэҕэ көһөрүллүбүт устудьуоннар үрдүк үөрэх кыһатын бары стипендияларыгар, академическай уонна эбии көрүллэр стипендияларга, киирсиэхтэрин сөп. Ол курдук, творческай, спортивнай, общественнай уонна научнай үлэҕэ уһулуччу ситиһиилэниилэрэ, анал ааты ылбыттара, анал биһирэбилгэ тиксибиттэрэ барыта сыаналанар. Усутдьуоннар сайабылыанньаларын ХИФУ үөрэх подразделенияларын деканаттарыгар олунньу 3 күнүгэр диэри туттарыахтаахтар.

0
0

Хоруй суох

Хоруйдаа