Тулалыыр эйгэни харыстааһын чэрчитинэн улуустарга кыыл-сүөл, көтөр-сүүрэр суолун-ииһин көрөр, ааҕар-суоттуур, хонтуруоллуур үлэ бу кэмнэргэ ордук күүһүрэр. Ньурбаҕа уонна Намҥа ыытыллыбыт үлэлэр тустарынан СӨ айылҕа харыстабылын министиэристибэтин пресс-сэкирэтээрэ Анна Налимова иһитиннэрдэ.
Кини кэпсээбитинэн, быйыл Ньурбаҕа ураты харыстанар сир-уот иниспиэктэрдэрэ рейдэ түмүгүнэн бэдэр, хотугу таба, тайах, киис, куобах, улар уонна куртуйах суола-ииһэ элбээбитин быһаарбыттар. Хонтуруоллааһын, чопчулааһын үлэтигэр Ньурба — «Ээдьээн» РР – Ньурба сирдэринэн Тихон Григорьев, Юрий Андреев сылдьыбыттар.
Онтон Намҥа ураты харыстанар сир-уот иниспиэктэрдэрэ Александр Трапезников, Иннокентий Суздалов уонна Иннокентий Кривошапкин «Харбаайы» РР үлэлээннэр кыыл-сүөл, көтөр-сүүрэр аһыырыгар бэлэмнэниллибит анал сирдэр, тураҥнаах сирдэр саҥардыллыбыттарын иһитиннэрбиттэр.
Анна Валерьевна бэлиэтээбитинэн, тулалыыр эйгэни харыстааһыҥҥа үлэ тиһиктээхтик ыытылларын түмүгэр, кыыл-сүөл, көтөр-сүүрэр ахсаана чопчуланар. Сыралаах үлэ түмүгүнэн, СӨ Кыһыл кинигэтигэр үөн-көйүүр – 16, балык – 6, уу-хонуу харамайдарын – 3, сыылааччылар — 2 араастара, чыычаах – 68, үүтүнэн иитээччилэр 17 көрүҥнэрэ эбии киллэриллибиттэр.
