Өрөспүүбүлүкэ күнүгэр үлэтин саҕалаабыт икки тылынан тахсар Ulus.media сайт Саха сирин улуустааҕы хаһыаттарын сонуннарын биир Интернет-былаһааккаттан таһаарар буолбута нэдиэлэттэн орто. 34 улуус хаһыатын түмэр сайт хаһыаттар суруналыыстарын айар үлэлэрэ өрөспүүбүлүкэ таһымыгар тахсыытыгар саҥа кыаҕы арыйда. Сайт үлэтин саҕалыаҕыттан ыла улуустар хаһыаттара биир улахан хамаанда састаабыгар киирдилэр.
Ulus.media-ҕа хаһыаттартан саҥа саҕалааһыны өйүүр санаалар, этиилэр киирдилэр. Ол курдук Ленскэй, Алдан, Муома, Амма улуустарыттан редактордар сайт аһыллыытынан онлайн-эҕэрдэлэрин ыыппыттара. Ону сэргэ «Якутия» хаһыакка Булуҥ, Ньурба, Чурапчы, Ленскэй улуустарын хаһыаттарын салайааччыларын толкуйдара бэчээккэ таҕыста. Кинилэр Ulus.media оройуон хаһыаттарын саҥа таһымҥа таһаарбытын, муниципальнай хаһыаттарга саҥа ааҕааччылары тардыбытын итиэннэ нэһилиэнньэ кэрэхсиир сонуннарын ааҕан, сайт сонуннарын биһирээн эрэрин бэлиэтииллэр.
Бүлүү улууһун «Олох суола» хаһыатын кылаабынай эрэдээктэрэ Василий Мандаров этэринэн, бүлүүлэр Ulus.media. сайт үлэлээн эрэрин биһирээбиттэр: «Бары 34 улуус хаһыатын бииргэ түмэр портал тэриллиитин өйүүбүн. Маннык сайт олох сайдыытыгар көмөлөөх ньымалартан, суоллартан биирдэстэрэ дии саныыбын: ааҕааччыларга өрөспүүбүлүкэ муниципальнай тэриллиилэрин олохторун-дьаһахтарын туһунан тирээн турар суолталаах, сэргэх сонуннары, тыа сиригэр дьон санаата-оноото хайдаҕын, туох туруорсуулаахтарын түргэнник тиэрдэр. Биһиги көрүүбүтүгэр, төһө да нэһилиэктэрбитигэр Интернет мөлтөх буоллар, «Олох суола» сонуннарын тута икки-үс сүүстэн тахса дьон көрөр. Өрөспүүбүлүкэ киин куоратыгар уонна атын улуустарга олорор биир дойдулаахтарбыт улуустарын сонунун ааҕаллар уонна өссө күн да аайы маннык сонуннары ыла олоруохпутун баҕарабыт дииллэр. Биһиги ордук сайт чэпчэтиллибит көрүҥүн сөбүлээтибит. Тоҕо диэтэххэ, Интернет мөлтөх да сиригэр бу көмөтүнэн дьон сонуну ааҕыан сөп».
Хоту сир олохтоохторо, эмиэ төһө да Интернеттэрэ мөлтөҕүн иһин, Ulus.media соннуннарын ааҕа олороллор. «Колымская правда» хаһыат редактора Алексей Курило: «Биһиги оройуоммут олохтоохторуттан саҥа сайт туһунан туох санаалаахтарын ыйыталастыбыт. Аллара Халыма СӨ ОДьКХ тэрилтэ улуустааҕы салаатын дириэктэрэ Михаил Стрижов бу курдук этэр: «Үчүгэй саҕалааһын! Сайтка киирэн, «Колымская правда» хаһыат анал сирэйин арыйан ааҕабын, тоҕо диэтэххэ, оройуоммут хаһыата бэйэтин суруйууларыгар биһиги, коммунальнай хаһаайыстыба үлэһиттэрин, туһунан умнубат. Ону сэргэ мин урут үлэлээн-хамсаан сылдьыбыт Булуҥум улууһун туһунан куруук ааҕабын. Эһиэхэ барыгытыгар айар ситиһиилэри баҕарабын!». «Аллара Халыма оройуона» МТ дьаһалтатын баһылыгын бастакы солбуйааччы Катерина Дмитриева: «Киһи болҕомтотун тардар кэрэхсэбиллээх сайт. Саха сирин бары улуустарыттан элбэх интэриэһинэй уонна сэргэх сонуннар бааллар. Өрөспүүбүлүкэҕэ араас сайт баар эрээри, миэхэ бу сайт ордук табыгастаах уонна үчүгэй курдук. Ону таһынан манна хаһыаттар сахалыы уонна нууччалыы тылынан таһаарыылара баара кэрэхсэтэр. Саҥа информационнай бырайыакка ситиһиилэри баҕарабын!».
Оттон «Олекма» хаһыат редактора Дария Тимофеева санаатын бу курдук этэр: «Бу сайты мин билэр сорох дьонум бастаан соһуйа көрсүбүттэрэ. Пиэрибэй Маай бырааһынньыга саҥардыы ааһаатын кытта, ватсапка тута ол туһунан хаартыскалаах сонун баар буолбута. Чуолаан эттэххэ, сайтан сонуннаах ссылканы төрөөбүт дойдуларыттан ыраах олорор биир дойдулаахтарбытыгар тутатына ыыппыппыт. Сунтаартан биир билэр дьахтарым эрийэн, “Ulus.media сайтан тапталлаах хаһыаппын булан аахтым” диэн кэпсээтэ. Итинник араас санаа баар. Ыччат буоллаҕына, оройуон хаһыатын сайтан да эрэ ааҕыахха сөп, кумааҕы хаһыат ааспыт кэм диир. Саастаах дьоммут син-биир хаһыаттарын кэтэһэллэр».
Саҥа портал аһыллыаҕыттан ыла 11 күн ааста. Сайт Саха сирин бары муниципальнай тэриллиилэрин олохторун араас өрүтүн хабан сырдатар: сааскы субуотунньуктар, ыһыы үлэлэрэ, Өлүөнэҕэ көмүөл мууһа хамсааһына хайдах баран иһэллэрэ, халааҥҥа уонна баһаары утары үлэлэргэ, Кыайыы күнүгэр бэлэмнэнии хаамыыта, миэстэтигэр дьону туох долгутара, кинилэр туруорсуулара.
Саамай кэрэхсэбиллээҕэ диэн – сайт улуустартан түмүллүбүт сонуннарыттан бүтүн өрөспүүбүлүкэ олоҕун хартыыната көстөн тахсар. Саҥа информационнай портал сыыйа Саха сирин саамай ааҕыллымтыа сонуннардаах сайтыгар кубулуйуо диэн эрэнэбит.
Ulus.media сайт сонуннарын дойдубут атын регионнарыгар, ону ааһан аан дойду араас муннуктарыгар олорор биир дойдулаахтарбыт ааҕаллар. Араас идэлээх, араас саастаах, олохторугар араас уопуттаах дьон ааҕар. Кинилэри оройуон олоҕо интэриэһиргэтэр, онно олорор билэр дьоннорун, аймахтарын, табаарыстарын, Уһук Хоту сири баһылааһыҥҥа урут бииргэ үлэлээн ааспыт энтузиаст үөлээннээхтэрин тустарынан ааҕаллара олус кэрэхсэтэр.
Полина Николаева.
