СӨ тырааныспарга министиэристибэтэ айанньыттары коронавирус тарҕаныытыттан харыстыыр сыалтан, тиэйэр-таһар тэрилтэлэргэ сүбэ суруктары ыыталаата. Улуустар икки ардыларыгар айаны тэрийэр предпринимателлэр ханнык быраабылалары тутуһаллара суруллар, СИА иһитиннэрэр.
Массыынанан айаны тэрийээччилэр ханнык быстах быраабылалары тутуһалларыгар сүбэлэри министиэристибэ от ыйын 1 күнүгэр ылыммыта. Сурук муниципальнай оройуоттарга, куорат уокуруктарыгар, итиэннэ тиэйэр-таһар предпринимателлэргэ тириэрдилиннэ.
Өрөспүүбүлүкэҕэ дьону автобуһунан таһар 200 предприниматель баар. Оттон кыра массыынанан таһааччылар ахсааннара — 300, диэн СИА-ҕа баһылык уонна бырабыыталыстыба пресс-сулууспата иһитиннэрдэ.
Быстах кэмҥэ сүбэлэргэ олоҕуран, такси салона дезинфекцияланыахтаах, суоппардар тус харыстанар сириэстибэлэринэн туттуохтаахтар, пассажирдартан мааска кэтэллэрин ирдиэхтээхтэр, төһө кыалларынан социальнай тэйичи туттуу баар буоларын тутуһуохтаахтар.
Оптуобустар салоннарын барыах-кэлиэх иннинэ салгылатыы ирдэнэр, дезинфекциялыыр сириэстибэнэн инчэҕэй убуорка ыытыллар. Мааската суох пассажирдарга киирэллэригэр мааска, дезинфекциялыыр сириэстибэ бэриллэр.
Муниципалитеттар икки ардыларыгар өрөспүүбүлүкэҕэ икки хайысха баар: «Дьокуускай – Аллара Бэстээх тимир суох ыстаансыйата» – кыһыҥҥы кэмҥэ; – «Дьокуускай – Покровскай – Мохсоҕоллоох» – сылы эргиччи.
Мохсоҕоллооххо дьону тиэйии-таһыы от ыйын 3 күнүгэр саҕаламмыта. Үлэ күнүгэр түөртүү рейс.
