Игнатий Спиридонов, Кэбээйи улууһун баһылыга:
— Биһиги улууспут сайдарын туһугар Егор Борисов элбэх үлэни, көмөнү оҥордо. Социальнай эбийиэктэр тутулуннулар, гаас киирдэ, суол-иис оҥоһулунна, сибээс, интэриниэт хаачыстыбата тубуста. Олохтоох нэһилиэнньэ өрөспүүбүлүкэ Аҕа баһылыгын өйөбүлүн бэркэ билэр. Онон, кини бэлиитикэтин өрүү өйүүбүт. Саамай үөрэрбит диэн, тыа сиригэр нэһилиэнньэ аҕыйааһына аччаан, хата эбиллии баар.
Биһиги улахан эбэ кытылыгар олорор буоламмыт, быйыл Бүлүү Өлүөнэ өрүскэ түһэр киэҥ сиригэр уу таһыма үрдээн, куттал буола сырытта. 1998 с. курдук 2018 с. улахан уу хас да нэһилиэги ылла. Ону өрөспүүбүлүкэ салалтата, ЫБММ түргэнник үлэлээннэр, бөртөлүөтүнэн ас-таҥас, көмө кэмигэр кэллэ.
Оттон Айсен Николаев Ил Дархан э.т. ананар кэмигэр бэлиитикэҕэ улахан уларыйыы буурҕата ытыллан ааспытын кэнниттэн, хап-хара былыт быыһыттан аламай сырдык күн сандаарыччы тыган, эдэр кустук тахсыбыта. Кини Дьокуускай баһылыга буолуоҕуттан салайар үлэҕэ элбэх уларыйыыны киллэрдэ, норуот туох кыһалҕалааҕынан бэйэтэ туруорсан, этии киллэрэр кыахтанна. Дьон санаатын түмэн, куораппытын тупсарыыга үтүмэн үлэ ыытыллар.
Кини үпкэ-харчыга сатабыллаах үлэһит, эдэр сааһыгар номнуо «Алмаасэргиэнбаан» дириэктэринэн, үп миниистиринэн, СӨ Бэрэсидьиэнин уонна Бырабыыталыстыбатын дьаһалтатын салайааччытынан үлэлээбитэ. Сахабыт сирин киин куоратын салайан олорбут киһи өрөспүүбүлүкэ сайдыытын туһугар өссө да элбэҕи оҥоруо, норуот интэриэһин өрө тутуо диэн эрэлбит улахан.
Марианна Тыртыкова, «Саха сирэ», edersaas.ru
