Бэҕэһээ, биир кэлим куоластааһын күнүгэр өрөспүүбүлүкэҕэ барыта 110 баһылыгы таллылар: үс улуус, 103 нэһилиэк, түөрт дьокутааттар сэбиэттэрин баһылыктарын.
Барыллаан ааҕыынан Хаҥалас улууһугар Олег Иринеев, Сунтаарга – Анатолий Григорьев, Аммаҕа – Николай Архипов дьон итэҕэлин ылан, улуус баһылыктарынан талылыннылар. Баһылыктар үһүөн «Биир ньыгыл Арассыыйа» баартыйа чилиэттэрэ.
Сунтаар улууһугар эрдэ баһылыгынан үлэлии сылдьыбыт Анатолий Григорьев 9599 куоластааччы 8333 куолаһын, о.э. быыбардааччы 86,8% ылан, кыайыыны ситистэ. Быыбарга уопсайа нэһилиэнньэ 57% кыттыбыт.
Хаҥалас улууһугар быыбарга 10041 киһи кыттыбытыттан 5748 Олег Иринеев туһугар биэрбит. Ити куоластааччы 57,2%. Иккиһинэн 2637 куоластаах Наталья Борисова буолбут.
Аммаҕа эрдэ баһылыгынан үлэлии сылдьыбыт Николай Архипов кыайбыт. Кини куоластааччы 4875 куолаһын ылбыт. Михаил Артемьев 3641 куолаһы ылан иккис буолбут.
Киин быыбардыыр хамыыһыйа дьиҥнээх иһитиннэриитэ хойутуу биллиэ.
