Ойуур пуондатыгар 22 баһаары умуруораллар, уопсай иэнэ 3 328,5 га. Барыта 1 635 киһи уонна 203 техника үлэлиир. Бырабыыталыстыба бэрэссэдээтэлэ Андрей Тарасенко видеоконференцсибээһинэн улуус баһылыктарын кытта мунньахтаата, суруйар СИА.
Барыта 149 ойуур баһаара турбута бэлиэтэнэр, уопсай иэнэ 32 557,24 га, онтон 104-гэр уоту умуруорууга миэрэ ылыллар, уопсай иэнэ 4 347,2 га. 45 баһаар тохтотулунна, уопсай иэнэ 28 210,04 га (АППГ – 52 уот, иэнэ 30 952,01 га).
Экология миниистирэ Сахамин Афанасьевэппитинэн, бэс ыйын 7 күнүгэр 22 уоту умуруорууга үлэ ыытыллар: Ньурба — 3, Сунтаар — 4, Кэбээйи — 4, Бүлүү — 2, Үөһээ Бүлүү — 2, Ленскэй — 1, Уус Майа — 1, Хаҥалас — 1, Өлүөхүмэ — 1, Томпо — 2, Нерюнгри — 1. Бүлүү, Ленскэй, Сунтаар оройуоннарыгар 639,0 га иэнннээх түөрт уот тохтотулунна.
Баһаары умуруорууга 1 635 киһи уонна 203 техника үлэлиир. «Авиалесоохрана» сайаапкатынан 22 салгын суудуната — 17 сөмөлүөт 18 оройуон уонна Дьокуускай ойуурун маныыллар. 5 бөртөлүөт ойуур баһаарыгар сылдьар: дьону тиэйэр-таһар, уоту кытта охсуһууга бөлөхтөрү тириэрдэр, ГСМ, аһыыр ас илдьэр.
Саха сиригэр Уһук Илиҥҥи уокуруктан 170 десантник-баһаарынай кэллэ.
Мунньах түмүгэр Андрей Тарасенко улуус баһылыктарыгар ойуурга уот турбатыгар ыытыллар үлэни өссө күүһүрдэллэригэр сорудахтаата. Уот нэһилиэнньэлээх пуунтан чугас турарынан, дьон дьалаҕай, сэрэҕэ суох сыһыаныттан баһаар тахсыан сөбүн бэлиэтээн туран, туох баар ирдэбиллэри тутуһалларыгар эттэ.
