Саха сиригэр «Улахан ыҥырыылар — 2020» Бүтүн Россиятааҕы научнай-технологическай бырайыактарга куонкурус регионнааҕы түһүмэҕэ буолар. 16 оройуонтан 70 үөрэнээччи кыттар.
«Саха сирин Кыра академиятын баазатыгар үһүс сылбытын «Улахан ыҥырыылар» куонкурус регионнааҕы түһүмэҕин ыытабыт. Өрөспүүбүлүкэ талааннаах оҕолоро муһуннулар. Кинилэр муниципальнай этаап кыайыылаахтара. Быйылгы бырайыактар үрдүк таһымнаах буолалларыгар эрэллээхпит. Сылын аайы Россия таһымыгар бастыҥ үлэлээхтэр ахсааннарыгар биһиги оҕолорбут киирсэллэрин уопут көрдөрөр«, — диэн регион үөрэҕириигэ уонна наукаҕа миниистирин солбуйааччыта Владимир Тихонов эттэ.
Быйыл барыта 54 научнай бырайыак 12 хайысханан киирдэ: өйдөөх куорат уонна куттал суох буолуута, нанотехнологиялар, Арктиканы баһылааһын уонна акыйаан, космическай технология, когнитивнай чинчийиилэр уо.д.а.
Оҕолор биэс күн устата үөрэх бырагырааматын ааһыахтара, куонкурус экспердэриттэн консультация ылыахтара, интэриэстээх тэрилтэлэр бэрэстэбиитэллэрин кытта көрсүөхтэрэ.
Түмүктүүр бырайыактары көмүскээһин кулун тутар 14 күнүгэр буолуоҕа, түмүгү кулун тутар 15 күнүгэр таһаарыахтара.
