Учуутал — кэнчээри ыччаты билии киэҥ аартыгар сирдиир күндү киһи

0
1031

Ытыктабыллаах учууталлар, үөрэх эйгэтин үлэһиттэрэ, педагогическай үлэ бэтэрээнэрэ! Саха Өрөспүүбүлүкэтин Ил Түмэнэ эһигини Учуутал күнүнэн эҕэрдэлиир!


Үгэс быһыытынан биһиги алтынньыга үөрэх үлэһиттэрин идэлээх бырааһынньыктарынан чиэстиибит, махтал үтүө тылларын этэбит. Учуутал күнэ хас биирдиибитигэр оҕо сааспытын санатар, оскуолатааҕы сылларбытын эргитэр истиҥ бырааһынньык. Билии киэҥ аартыгар сирдээбит учууталларбыт, эһиги, олохпут тухары өрүү күндү, чугас дьоммут буолаҕыт. Ааҕарга-суруйарга үөрэтииттэн саҕалаан, дэгиттэр сайдыылаах, аныгы олоххо бэлэмнээх, күрэстэһэр кыахтаах, дойдуга бэринилээх гражданины иитиигэ эһиги күннэтэ сыраалаах үлэҕитинэн олук буолаҕыт.

«Үөрэх туһунан» федеральнай сокуоҥҥа сөп түбэһиннэрэн, оҕону иитии уонна үөрэтии саҥа таһымҥа тахсар, оҕону оскуола иннинээҕи уонна эбии үөрэтиигэ улахан болҕомто ууруллар буолла. Ил Түмэн өрөспүүбүлүкэҕэ үөрэх эйгэтин сайыннарыыны сокуоннарынан хааччыйыыга, нэһилиэктэргэ дьоҕус оскуолалары оннунан хаалларыыга, «2012-2019 сс. Саха Өрөспүүбүлүкэтигэр үөрэхтээһини сайыннарыы» судаарыстыбаннай быраагырама олоххо киириитигэр утумнаах үлэни ыытар.

Үөрэхтээһин эйгэтигэр кэм-кэрдии ирдэбилинэн уларыйыылар тахсыбыттарын да иһин, хаһан баҕарар үөрэтии ис хоһоонугар учуутал быһаарар оруоллаах буолуоҕа. Саха сирин педагогтара бу эппиэттээх соругу үрдүктүк тутан, саҥа үйэ киһитин иитиигэ уонна үөрэтиигэ инникитин да ситиһиилээх буолуохтарыгар эрэнэбит.

Эһиэхэ айымньылаах үлэни, махталлаах үөрэнээччилэри, чэгиэн туругу, дьолу, этэҥҥэ буолууну баҕарабыт.

Саха Өрөспүүбүлүкэтин Судаарыстыбаннай Мунньаҕа (Ил Түмэн)

0
0

Хоруй суох

Хоруйдаа