Уһук Илиҥҥи федеральнай уокурукка олорор инбэлиит оҕо эмтэнэ барар айанын уйунуохтара. Уураахха РФ бырабыыталыстыбатын бэрэссэдээтэлэ Михаил Мишустин илии баттаата, суруйар «Парламентская газета».
Урут маннык чэпчэтии, өскөтүн эмтэнэр сиригэр тимир суолунан көлө тиийбэт эрэ буоллаҕына, көрүллэрэ. Билигин социальнай страховкалааһын пуондата, тимир суол баарыттан-суоҕуттан тутулуга суох, оҕо эмтэнэ барарыгар сөмөлүөтүнэн айан иһин төлөбүрү уйунуоҕа.
Инбэлиит оҕону арыаллааччыга эмиэ босхо билиэт көрүллэр.
Бырабыыталыстыба этэринэн, маннык быһаарыы оҕо эмтэнэр сиригэр түргэнник тиийэн, хаачыстыбалаах медицинскай өҥөнү ыларыгар туһалыа.
