НВК САХА — Владимир Путин эдэр ыалларга 2 %-наах чэпчэтиилээх ипотека олохтооһунун өйөөтө уонна бырагырааманы 2019 сылга хайыы үйэ саҕалыахха наадатын эттэ.
«Биһиги бэҕэһээ регионнар салайааччыларын кытары ити боппуруоһу дьүүллэспиппит. Эдэр ыаллар Уһук Илиҥҥи региоҥҥа кыбартыыра, эбэтэр дьиэ ылалларыгар сыллааҕы быраһыана 2 %-ҥа тэҥнэһэр анал ипотека бырагырааматын саҕалыыры өйүүбүн», – диэн Россия бэрэсидьиэнэ В.В. Путин бэлиэтээтэ.
Бу бырагыраама Уһук Илин регионнарыгар эрэ туһаайыллан олохтонорун тоһоҕолоон эттэ: «Бу миэрэ сүрүн соруга — Уһук Илин уокуругар үөрэхтээх уонна квалификациялаах исписэлиистэри тардыы буолар».
Дойду бэрэсидьиэнэ бырагырааманы 2019 сылга 5 сыл болдьохтоох саҕалыырга этии киллэрдэ. Бырагыраама саҥа тутуллар дьиэҕэ кыбартыыра ыларга, эбэтэр гектар сири ылбыт дьон дьиэ тутталларыгар ананар. Үбүлээһини Уһук Илин бырагырааматыттан уонна Уһук Илини сайыннарыы пуондатыттан ыларга соруйда.
