Уһук Илин дьокутааттара биэнсийэҕэ тахсар сааһы уруккутунан хаалларары туруорсаллар

Приморскай кыраайтан Госдуума тырааныспарка уонна тутууга кэмитиэтин чилиэнэ Сергей Сопчук от ыйын 1 күнүгэр Дьокуускайга кэлэ сылдьан биэнсийэҕэ тахсар сааһы  уруккутунан хаалларыахха сөбүн туһунан бэйэтин санаатын үллэһиннэ.

Кини этэринэн, ньыгыллар Уһук Илин эрэгийиэннээҕи дьокутааттара бары түмсэн, бу эҥээргэ олорор дьоҥҥо бочуоттаах сынньалаҥҥа тахсар сааһы уруккутунан хаалларары туруорсар этиилэрин Госдуумаҕа киллэрбиттэр. Арассыыйа үрдүнэн биэнсийэҕэ тахсар сааһы уһатыы сокуон барыла бастакы ааҕыытын ааспыта эрээри, аны күһүн иккис ааҕыыга салгыы ааһара-ааспата чуолкайданыахтаах.

«Эр киһи уонна дьахтар биэнсийэҕэ тахсарыгар билиҥҥи сокуон барыла икки сыл арыттаах, ону уруккутунан биэс сыл арыттаах хаалларары Уһук Илин дьокутааттара бары күүспүтүн түмэн туруулаһабыт. 2019-2020 сс. биэнсийэҕэ тахсар саастарын сиппит дьон урукку сокуонунан сынньалаҥҥа тахсалларын туруорсабыт. Госдуумаҕа 450 дьокутаат баар, онтон 19-һа  Уһук Илин эрэгийиэнтэн баартыйа испииһэгинэн, биир мандааттаах уокуруктартан турар. Ахсааммытынан аҕыйахпыт эрээри, дьүккүөрдээхтик киирсэр санаалаахпыт», — диэн эттэ Сергей Сопчук.

Уһук Илин дьокутааттарын туруорсууларын РФ бырабыыталыстыбата ылыннаҕына, бочуоттаах сынньалаҥҥа урукку бэрээдэгинэн дьахталлар 50 саастарыгар, эр дьон 55-гэр тахсыахтара.

Марианна Тыртыкова, «Саха сирэ», edersaas.ru

This post was published on 02.08.2018 13:59 13:59