Уһук Илиҥҥи федеральнай региоҥҥа сир учаастагын түҥэтии туһунан сокуон олоххо киирбит бастакы күнүгэр Ил Дархан Егор Борисов «Россия24» телеханаалга быһа эфиргэ тахсан ыйытыыларга эппиэттээтэ.
Сокуон киириитин бастакы түһүмэҕэ, бырабыыталыстыба быһаарыытынан, Нерюнгри оройуонугар саҕаланарын Егор Борисов эттэ. «Саха сири соҕуруу өттүгэр сүрүннээн промышленнай тэрилтэлэр үлэлииллэр. Ол иһин биһиги онно агропромышленнай оҥорон таһаарыы хайысхата эмиэ сайдыахтаах диэн быһаарбыппыт», — диэтэ кини.
Сокуон киириитин иккис түһүмэҕэр, ол эбэтэр 2016 сыл алтынньы 1 күнүттэн, сири босхо түҥэтиигэ 91 мөлүйүөн гектар сир көрүллэрэ былааннаммытын кини иһитиннэрдэ. «Биһиги сирбит-уоппут киэҥ. Онон сокуон чэрчитинэн ким ханнык хайысханан, баҕа санаалааҕынан сири көрдөөбүттэргэ барыларыгар тиийиэн сөп», — диэн бэлиэтээн эттэ.
Манна эбии Егор Борисов Саха сирин төрүт олохтооҕор, өскөтүн кини сир учаастагынан туһаныан баҕарарын биллэрдэҕинэ, тыа хаһаайыстыбатынан дьарыктаныыны өйүүр сыалтан эбии 2,5 гектар сир бэриллэрин иһитиннэрдэ. Оччотугар олохтоох дьон 3,5 гектар иэннээх сир учаастагын ылыахтарын сөп.
