Атырдьах ыйын 18 күнүгэр Саха Өрөспүүбүлүкэтин бырабыыталыстыбатын бэрэссэдэтэлэ Галина Данчикова, бырабыытылыстыба чилиэннэрэ, миниистирдэр солбуйааччылара Бүлүү куоратыгар сылдьан саҥа тутуллар эбийиэктэргэ үлэ хаамыытын билистилэр, “Кэскил” оҕо интеллектуальнай-айар киинигэр куорат, нэһилиэктэр баһылыктарын, тэрилтэлэр салайааччыларын кытта көрсөн “Босхо гектар” туһунан саҥа сокуон киириитигэр көрсүллэр сүрүн кыһалҕалары, улуус төһө бэлэмин ырыттылар.
Бырабыталыстыба премьер-министрэ Галина Данчикова, тутуу министрэ Вера Кузакова уо.д.а. Бүлүү куоратын саҥа “Молодежнай” микро-оройуонугар судаарыстыба уонна кэтэх сирэй кыттыгас ньыматынан тутуллар 200 миэстэлээх оҕо уһуйаанын, АЛРОСА акциятын дибидиэнигэр тутуллар Култуура Дыбарыаһын бастакы уочаратын, Балыыһа комплексын тутуутун бастакы уочаратын, өрөспүүбүлүкэ уонна федеральнай киин үптэринэн тутуллар спорт саала тутуутун, “Хаарбах дьиэттэн көһөрүү” программанан тутуллар 96 кв дьиэни көрдүлэр, тутааччылары кытта кэпсэттилэр.
Галина Данчикова федеральнай үп кыттыылаах объектары кэмигэр киллэрэргэ сорук туруорда, болҕомтону тутуу хаачыстыбатыгар туһаайарга бэлиэтээтэ.
“Кэскил” оҕо киинигэр куорат, нэһилиэктэр баһылыктарын, тэрилтэлэр салайааччыларын кытта көрсүһүүгэ сүрүн боппуруоһунан “Уһук илиҥҥи гектар” федеральнай сокуон олоххо киириитигэр – сири кэтэх дьоҥҥо биэриигэ бэлэмнэнии буолла. Тоҕо бу боппуруос турда? Нерюнгрига саҕаламмыт бастакы пилотнай бырайыак көрдөрбүтүнэн, Россия координаттарын государственнай систиэмэтэ Саха сиринээҕи олохтоох координаттары кытта сорҕото сөп түбэспэтэ көстүбүт. Онон, Саха сиригэр ходуһа, мэччирэҥ сирин докумуоннарын оҥорууга, хаттаан регистрациялааһыҥҥа дьону көҕүлүүргэ олохтоох былаас иннигэр улахан сорук турда. Ити туһунан мустубут дьоҥҥо Баай-дуол уонна сир сыһыаннаһыыларыгар миниистир Евгения Григорьева иһитиннэриититтэн сылыктыахха сөп. Кини Саха сиригэр, Бүлүү улууһугар сир докумуоннарын оҥорууга хаалыы баарын бэлиэтээтэ, улууска тыа хаһаайыстыбатыгар туһаныллар сир докумуоннарын оҥоруунун түргэтэргэ сүбэлээтэ. Сүбэ-мунньахха этиллибитинэн, айдааннаах координаттары тэҥнээһин үлэтэ алтынньы ыйга түмүктэниэхтээх.
Федеральнай информационнай систиэмэ көрдөрөрүнэн, Бүлүү улууһун тыатын хаһаайыстыбатыгар туһаныллар сир 80 бырыһыана саҥа сокуонунан кэтэх илиигэ бэриллэр туруктаах. Билиҥҥитэ улууска Бөтүҥ, Халбаакы, Тааһаҕар нэһилиэктэрэ эрэ оттуур сирдэрин докумуоннарын оҥорторбуттар.
Галина Данчикова балаҕан ыйын 1 күнүгэр диэри сири туһанааччылар сир сулууспаларыгар биллэрии (уведомление) түһэрэллэригэр үлэни ыытарга, муниципальнай тэрээһиннэргэ көмөҕө специалистары ыытыахтарын бэлиэтээтэ.
Саха сирин салалтата оттуур сири, мэччирэҥ сирин бэйэбит илиибитигэр хаалларарга сорук туруорар. Итиннэ былаас олохтоох таһымыгар күүстээх үлэни ыытарга сорук турда.
Санаттахха, алтынньы 1 күнүттэн Илик уһун регион олохтоохторо Саха сиригэр Федеральнай информационнай система көрдөрөрүнэн докумуона суох сири ылар кыахтаналлар, онтон олунньу 1 күнүттэн Россия хайа баҕарар олохтооҕо итинник бырааптанар, ол иһин бүлүүгэ ыытыллыбыт сүбэ-мунньахха сири докумуоннатыы тэтимин түргэтэргэ сорук турда.
