Өрүс училищетын саалатыгар ахсынньы 14 күнүгэр “Икки сулус” бастакы өрөспүүбүлүкэтээҕи куонкурус үрдүк таһымнаахтык ааста.
Тэрээһини орто анал үөрэхтээһин министиэристибэтэ уонна Дьокуускайдааҕы дизайн,технология колледжын педагог-тэрийээччитэ Лена Федорова көҕүлээн ыыттылар. уһуйааччылара уонна устудьуоннара кэлэн күрэстэстилэр. Дизайн уонна технология колледжын устудьуона Валерия Кычкина уонна колледж үөрэх уонна иитии чааһын сэбиэдиссэйэ Семен Семенов иилээн-саҕалаан ыыттылар. Күрэххэ кыттыбыт Уус-Алдантан, Нерюнгриттан, Бүлүүттэн уонна Дьокуускай куораттан преподаватель уонна устудьуон уопсайа 31 нүөмэри көрөөччү, дьүүллүүр сүбэ болҕомтотун киинигэр таһаарда. Манна уһуйааччы да, устудьуон да талааннара көһүннэ. Күрэстэһиини 5 чилиэннээх дьүүллүүр сүбэ сыаналаата. Манна бэрэссэдээтэлинэн орто анал үөрэхтээһин кылаабынай специалиһа Алексей Данилов үлэлээтэ. Жюри састаабыгар хомус музейыттан Туяра Жиркова, Арктика институтун эстраднай вокал уһуйааччыта Станислав Олесов, «Сахабэчээт» специалиһа Ньургуйаана Скрябина уонна эстрада ырыаһыта Василий Сорокин –Айгылаан киирдилэр.
Уһуйааччылар уонна устудьуоннар уус-уран ааҕыыга, ырыаҕа, үҥкүүгэ, хомуска талба талааннарын көрдөрдүлэр. Күүрээннээх күрэстэһии түмүгүнэн, уус- уран ааҕыы муҥутуур кыайыылааҕынан тапталга анаммыт хоһоону аахпыт, Жатайдааҕы техникумтан Зарета Евлоева уонна Андрей Петров буоллулар. Дьүрүскэн хомус кыайыылаахтарынан дизайн уонна технология колледжыттан Ирина Каратаева уонна Варя Корякина ааттаннылар. Ырыа бастыҥнарынан дизайн уонна технология колледжын ырыаһыттара Татьяна Скрябина, Фекла Сорокина буоллулар. Аныгы үҥкүү күрэһин түмүгэр Дьокуускайдааһы педагогичекай индустриальнай колледжтан Нина Скрыбыкина уонна Николай Тюменцев кыайыылааҕынан таҕыстылар. Муҥутуур кыайыылаах аатын тыа хаһаайыстыбатын техникумуттан Петр Федоров уонна Лия Седалищева ылан, үөрүүлэрэ үрдэттэ.
Кыайыылаахтар анал кубогынан уонна “Одарич” маҕаһыынын сертификаттарынан наҕараадаланнылар. Кыттааччылар бары туоһу суруктарынан бэлиэтэннилэр.
