19 Кулун тутар 19.03
  • -19°
  • $ 91,98
  • 100,24

«Тыымпы» кэпэрэтиип эргэ хотоно сүөһүлэри баттаата

10:02, 22 февраля 2017
Текст:
Читайте нас на
Яндекс Новости
ЯДВ

Бүлүү улууһугар Тыымпыга б.дь. олунньу 18 күнүгэр “Тыымпы” производственнай кэпэрэтиип эргэ хотонун үрдэ сорох сиринэн сиҥнэн түһэн, онно кыстаан турбут сүөһүлэр дэҥнэннилэр. Хотоҥҥо 129 ыччат сүөһү уонна тиҥэһэ баарыттан 14 сүөһү оһоллонно, ол иһигэр биир тиҥэһэ өллө. Ыараханнык эчэйбит 10 төбөнү салҕаан, эккэ ыыттылар. Бу туһунан edersaas.ru ааҕыҥ.


Кэпэрэтиип толорооччу дириэктэрэ Вячеслав Семенов: “Сопхуос саҕана 1981 с. тутуллубут хотон өрөмүөн күүһүнэн турбута. Быйыл хайдах эмит кыстатара буоллар дии саныыр этибит”, — диир. Хаһаайыстыба быйылгы кыстыкка 230 сүөһүлээх киирбитэ. Мантан 100 ыанньык ынах 2013 с. “Туймаада” хампаанньа туттарбыт саҥа хотонугар турар. Дириэктэр этэринэн, ити комплекс иккис уочарата тутулларыгар баҕалаахтар эбит.

Хотон бүтүн өттүн быстах бүөлээбиттэр. Баппатах 36 төбөнү саҥа хотоҥҥо уонна ыаллар хотоннорунан кыстата киллэрбиттэр. Улуус баһылыгын дьаһалынан тэриллибит хамыыһыйа акт оҥорбут. “Тыымпылар” хайдах буолаллар, сохсо буолан суоһаабыт эргэ хотонноруттан аны күһүн ханна куотан биэрэллэр?

Мантан тахсар биир суол баар: хаһаайыстыба бэйэтин күүһүнэн 2000 сыллар эргин арочнай хотону туттан испитэ, бетонун кутан уонна каркаһын туруоран баран, кыаммакка, хаалларбыта. “Миниистир Петр Алексеевка киирэ сырыттым. Петр Николаевич ити быраҕыллыбыт тутуу туруга, төһө үп ороскуоттаныахтааҕа быһаарылыннаҕына, улуус дьаһалтатын кытта көмөлөөн ситэрэргэ дьаһал ылыахпыт диэтэ. Оччоҕуна 120-чэ сүөһүбүтүгэр хотоннонон, балаһыанньаттан тахсыахпыт этэ”, — диэн эрэллээх түмүктээтэ Вячеслав Степанович.

Следите за самым важным и интересным в Telegram-канале и WhatsApp-группе ЯСИА
Тутаах тыллар