Сылын аайы ыытыллар Россия саамай кэрэ кыыһын талар «Мисс Россия-2016» куонкуруска Тюменьтан кыттыбыт 18 саастаах Яна Добровольская кыайыылааҕынан ааттанна.
Буоларын курдук, тэрээһин сыл бэлиэ күнүгэр сыһыары тутуллар. Быйылгы куонкурус космоһы кытта ыкса ситимнэннэ. Ырыаһыт Глюк’oZa уонна радио ыытааччыта Максим Привалов дьоро киэһэни ыыппыттарын туһунан киин бэчээт суруйар.
Бриллиант, чөмчүүк таастарынан киэргэтиллибит, көмүстэн кутуллубут 1 мөлүйүөн доллар сыаналаах, ханна да суох хоруона иһин дойду араас муннуктарыттан 50 кыыс күрэстэстэ.
Кыайыы көтөллөммүт Яна Добровольская албан ааты-суолу таһынан 100 тыһ.доллары уу харчынан, «Мисс Вселенная» аан дойдутааҕы куонкуруска кыттар быраабы ылла. Ону таһынан биллэр-көстөр, улахан ааттаах-суоллаах араас фирмалары кытта үлэлэһэр контрагы түһэристэ. Яна Добровольская үҥкүү, үөрэтии эйгэтигэр чугас.
