Ил Дархан Айсен Николаев 2021 сылтан тыа хаһаайыстыбатыгар оҥорон таһаарыынан дьарыктанар дьону өйүүр систиэмэни уларытар наадатын эттэ.
«Биир төрүөхтээх сүөһүгэ, сылгыга 35 тыһыынчаттан итэҕэһэ суох бэриллэрин курдук субсидиялааһын саҥа механизмын толкуйдуурга бырабыыталыстыбаҕа соруйабын. Ил Түмэн дьокутааттара уонна баһылыктар кыттыахтаахтар. Үүт туттарааччыларга биир лиитэрэ иһин 35 солк. 50 солк. диэри үрдэтиэххэ наада», — диэтэ Айсен Николаев.
2020 сыллаахтан «Развитие сельского хозяйства и регулирования рынков сельхозпродукции, сырья и продовольствия до 2024 года» судаарыстыбаннай бырагыраама үлэтин саҕалыаҕа.
«2020 сылга сүрүн хайысхалары үбүлээһини оннунан хааллардыбыт. Сүрүннээн сылгыны-сүөһүнү иитиигэ болҕомто ууруллуо. Эһиилгиттэн 25 ыанар ынахтаах хаһаайыстыбаларга көмө оҥоһуллуоҕа, урут 100 этэ. Ону таһынан, үүккэ субсидиялааһын эмиэ уларыйыаҕа», — диэн бэлиэтээтэ Ил Дархан.
Кини этэринэн, тыа сиригэр болҕомто уҕарыйыа суоҕа. Социальнай, коммунальнай эбийиэктэр салгыы тигинэччи тутуллуохтара. Нэһилиэк 95%-на интернеккэ холбонуоҕа.
