Кэлэр сылтан ыла Дьокуускайдааҕы тыа хаһаайыстыбатын академиятыгар Саха сиригэр саамай үрдүк стипендия төлөнүөҕэ.
Үөрэх сыла саҕаланыаҕыттан ыла академия иккис куурустан саҕалаан устудьуоннар үрдэтиллибит стипендияны ылыахтара. Оттон 2017 сыл тохсунньу 1 күнүттэн бастакы сессияларын үчүгэйдик түмүктээбит устудуьоннарга үрдээбит социальнай стипендия бэриллэр. Стипендия кээмэйэ 16 тыһ.солк. тахса. Ити туһунан академия проректорын э.т. Анна Черкашина эттэ.
«Стипендия муҥутуур кээмэйэ 25 тыһ.солк. тахса буолуоҕа. Маннык үрдүк социальнай төлөбүрү маҥнайгы кууруһу бүтэрбиттэр эмиэ ылар кыахтаахтар. Стипендияны таһынан материальнай көмө, толуйуу харчы баар буолуоҕа»,- диэтэ кини.
Саҥа үөрэх сылыгар академия үлэһиттэригэр эмиэ үөрүүлээх сонун баар. Ол хамнас үрдээһинигэр сыһыаннаах. Бу сыл олунньутуттан ректор э.т. Иван Слепцов агропромышленнай комплекс үлэһиттэрин кытта ыкса сибээһи олохтообута «Туймаада-Лизинг» лизинг компаниятын кытта инжеренэй факультет кафедратын аспыттара.
«Сахаплемобъединение» базатыгар агротехническэй хайысхалаах кафедраны үлэлэтэр былааннаахпыт. Үрдүк квалификациялаах специалистары бэлэмнээн таһаарар туһугар эбии үөрэхтэр баар буолуохтара», — диир Анна Черкашина.
Казахстан үрдүк үөрэҕин кыһаларын, ол иһигэр Назарбаев университетын кытта ситим олохтоммут. Манна устудьуоннар стажеровканы ааһыахтара.
Бу күннэргэ академия «Анаабыр алмаастарын» АО-ны кытта дуогабар түһэрсиэҕэ. Онно устудьуоннары үөрэтэргэ, үрдүк квалификациялаах идэлээх дьону бэлэмнээн таһаарарга элбэх үлэ ыытыллыаҕа.
