НВК САХА – СГТХА үһүс сылын норуоттар икки ардыларынааҕы бииргэ үлэлээһии бырайыагын сайыннарар.
Саҥа үөрэх дьылыгар атастаһыы бырагырааматынан академияҕа Монголияттан, Таджикистантан, Киргизияттан уонна Туркменистантан 90-ча устудьуон үөрэнэ сылдьар. Устудьуоннар бары бюджетнай миэстэлэргэ үөрэнэллэр, уопсайга олороллор. Быраактыкаларын өрөспүүбүлүкэ хаһаайыстыбаларыгар уонна тэрилтэлэригэр ааһаллар, түмүккэ үрдүк үөрэҕи бутэрбиттэрин туһунан туоһулуур диплом ылыахтара.
Бырагыраама чэрчитинэн Саха сирин устудьуоннара эмиэ атын дойдуларга баран үөрэнэллэр. Ааспыт үөрэх дьылыгар Германияҕа уонна Канадаҕа үөрэнэн кэлбиттэр.
Академия устудьуоннары атастаһыы бырагырааматын кэҥэтэр санаалаах. Үөрэх кыһатын салалтата Польша Краков куоратын тыа хаһаайыстыбатын академиятын кытары сөбүлэһии түһэрсэр былааннаах.
