«Кэлэр сылларга өрөспүүбүлүкэ үүнээйи суордун эбэтэр сүөһү боруодатын талан тупсарыы дьыалатыгар, ветеринарияҕа, сири оҥорууга, сири нүөлсүтүүгэ дьиҥнээх профессионалларга наадыйыыта күүһүрүөҕэ. Земскэй зоотехниктар, ветеринардар, агрономнар хаачыстыбалаах өҥөнү оҥорууга үлэлиэхтэрэ», — диэн тыа хаһаайыстыбатын академията иһитиннэрэр.
Дьокуускайдааҕы тыа хаһаайыстыбатын академията кулун тутар 11 күнүттэн улуустарынан сылдьан ыччаты бу наадалаах идэлэргэ үөрэнэллэригэр ыҥырар тэрээһинин саҕалыаҕа. Марафон Мэҥэ Хаҥалас улууһугар старт биэриэ. Улууска икки күн үлэлиэхтэрэ.
Күннэр бырагыраамаларын чэрчитинэн оскуола оҕолоругар консультациялар, төгүрүк остуоллар, устудьуоннары кытта үөрэнээччилэр атах тэпсэн олорон кэпсэтиилэрэ, академия олоҕуттан презентация көрдөрүүтэ буолуоҕа.
Академия хамаандата Майа, Лоомтука, Хорообут, Табаҕа, Мэлдьэхси, Аллараа Бэстээх, Төхтүр, Павловскай, Хаптаҕай, Ороссолуода, Төҥүлү, Балыктаах, Матта, Дьабыл оскуолаларын үөрэнээччилэрин барыларын хабар баҕалаахтар.
Көрсүһүү түмүгүнэн Мэҥэ Хаҥалас улууһун дьаһалтатын баһылыга Николай Старостин уонна академия ректорын э.т. Иван Слепцов бииргэ үлэлээһиҥҥэ Сөбүлэҥҥэ илии баттаһыахтара. Маны сэргэ траспорт техникума, профессиональнай лицей эмиэ академияны кытта дуогабар түһэрсиэхтэрэ. Ылыллар докумуоннар ис хоһоонноро биир — өрөспүүбүлүкэҕэ агропромышленнай салаа сайдыытыгар исписэлиистэри бэлэмнээһин.
Салгыы кулун тутар 21 күнүттэн Бүлүү бөлөх улуустарынан марафон салҕаныа. Муус устар бастакы аҥарыгар Таатта, Чурапчы, Амма, Уус Алдан, Горнай, Нам, Хаҥалас улуустарын хабыахтара.
