Бырабыыталыстыба бэрэссэдээтэлин солбуйааччыта — РФ президенин Уһук Илиҥҥэ боломуочуйалаах бэрэстэбиитэлэ Юрий Трутнев аэропорт комплексын эбийиэктэрин тутууну быһаарыы боломуочуйатын регионнарга биэрэр туһунан этии киллэрдэ. Ол туһунан кини Дьокуускай куоракка буолбут түмүктүүр мунньахха эттэ.
«Регионнар авиация эбийиэктэрин бэйэлэрэ сакаастаан туттарар боппуруостарын бырабыыталыстыбаҕа үөрэтиэхпит уонна этии киллэриэхпит. Үбүлээһинин кытта тэҥҥэ тутан, регионнарга боломуочуйаны туттарар наада. Маннык салайыннахпытына ордук табыгастаах буолуон сөп. Биһиги Москваҕа олорон Росавиация тутуутун салайарбыт арыый үлүннэриилээх соҕус«, — диэтэ Юрий Трутнев.
