Горнай оройуона кэлэр сылга XXI Манчаары Оонньууларын ыытар. Өрөспүүбүлүкэ вице-премьера Ольга Балабкина эппитинэн, спорт национальнай көрүҥнэригэр күрэхтэһии 2021 сыл от ыйын 7 күнүгэр саҕаланыахтара. Ол кэмҥэ эбийиэктэри тутуу түмүктэниэхтээх.
Өрөспүүбүлүкэ вице-премьера Ольга Балабкина салайааччылаах Горнай улууһугар буолбут мунньахха тэрийэр хамыыһыйа Манчаары Оонньууларыгар бэлэмнэнии сүрүн боппуруостарыгар тохтоото. Бастатан туран, элбэх көрүҥнээх спортивнай киин бастакы сыбаайата түһэрилиннэ. Эбийиэк «Демография» национальнай бырайыак чэрчитинэн «Спорт — олох нуормата» регионнааҕы бырайыагынан тутуллар. Туттууну бу сыл бүтүүтэ үлэҕэ киллэриэхтээхтэр.
Сотору кэминэн хантыраак түһэрсиллэн, спортивнай тир сыбаайата ууруллуохтаах уонна Оонньуулар кииннэринэн буолуохтаах 1000 миэстэлээх стадион уларытан тутуута саҕаланыаҕа. Маны сэргэ сэттэ олорор дьиэ дьэндэйэн тахсыахтаах. Бу барыта улуус киинигэр Бэрдьигэстээххэ тутуу сытыырхайбытын көрдөрөр.
Сайын суолу аспааллыахтара, ол кэннэ тэрийэр хамыыһыйаҕа өссө биир сорудах сүктэриллэр — тырааныспар сырыытын кыраапыгын оҥоруохтаах. «Урукку өттүгэр Оонньуулар буолар кэмнэригэр биирдэ эрэ кыраапыгы бигэргэтэр буоллахпытына, бу сырыыга барыта уларыйар», — диэтэ Ольга Балабкина. Бары үлэлэр 2021 бэс ыйын 30 күнүгэр бүтүөхтээхтэр диэн кини эбэн эттэ.
Оонньуулар историяларыгар аан бастаан «Оонньуулар посоллара» диэн өйдөбүл киириэҕэ. «Оонньуулар посолларын туһунан балаһыанньаны бигэргэттибит. Герман Контоев талаллынна. Кини Горнай улууһуттан төрүттээх. Биллэн турар, Оонньуулар кэмнэринэн кини сүрүн ньюсмейкерынан буолуоҕа. Итиэннэ Саха сирин олохтоохторун чөл олохтоох буолууларыгар ыҥырыаҕа», — диэтэ вице-премьер.
Горнайдар элбэх кыттааччыны уонна ыалдьыты күүтэллэр. Спорт ханнык көрүҥнэринэн күрэхтэһии буолара бигэргэннэ. Олунньу 22 күнүгэр старт бэриллибитэ.
